最近未有與舊公司Neway Star續約的前女子組合Hotcha成員Regen.C張惠雅，未有因自由身而「懶懶閒」，反而大玩cover dance MV，用行動証明自己既是跳得之人，更懂得做MV導演。

Regen接受《香港01》電話訪問時表示，今次拍攝cover dance MV絕非即興及隨便玩：「其實我一直都想拍 cover dance，不過呢個project我對自己好有要求，唔想好普通係studio入面拍，想將呢件事拍到好似有一個新MV嘅效果。我做呢個project嘅目的係想做啲嘢出嚟畀人睇，以前公司無咁free，依家自由身，想做多啲可以滿足自己嘅事。其實我一直都想有自己嘅快歌，但舊公司當時想我以情歌為主，所以既然自己無快歌，不如去用其他朋友嘅歌去cover，而且自己仲可以做MV導演，好有滿足感。今次呢個project我好多謝幫手拍嘅朋友，佢哋真係好有heart，而且大家要夾期真係好難，最後我哋四個人用咗一晚去完成呢件事。」

（今次個cover dance點解唔搵一向有合作嘅dancer麥秋成幫手？）

「其實我都想，不過我當時估佢會太忙，所以無搵佢，點知個mv推出後，佢同我講其實佢可以一齊玩，所以嚟緊都可能會同佢一齊再拍其他mv。」Regen說。

講開麥秋成，其實Regen早已在《心跳500天》MV時已經有合作，今次 Regen cover dance江海迦（AGA）嘅《3AM》，當中嘅舞步都與《心跳500天》有相似嘅地方。

Regen一向都表情多多，唔信你睇相就會知道！

Regen：其實我係呢行無咗滿足感好多年

Regen在接受電話訪問時，不禁大嘆工作得不到滿足感：「今次做呢個cover dance MV project真係令我好有滿足感，其實我係呢行無咗滿足感好多年，要數近年最令我有滿足感嘅工作就只係2013年出書《Regen大步走》，仲有同年出嘅個人單曲《心跳500天》。以前有簽公司真係做好多嘢都會無咁free，依家咩都可以自己決定相對好開心。不過做歌方面，因為我自由身嘅關係，我要學識投資，以前做歌唔駛自己出錢，但依家就要自己投資，自己都有少少積蓄。而且我身邊嘅好朋友都好好，知道我依家嘅情況都主動想幫手，佢哋真係猶如天使一樣。」