《JW王灝兒 Never Too Early 2018演唱會》昨晚完滿結束，頭半部份以愛情劇為主題，除了邀請關楚耀飾演前度合唱《不該》，更有坤哥吳業坤飾演暖男合唱《原來只因深愛著》。隨著劇情發展，為表現出分手後的失落，JW唱出《我們的寂寞》、《妒忌心》時，舞台灑下雨水，打在JW身上。看見她全身濕透，坤哥相當gentlemen的為她遞上毛巾。坤哥搞笑道:「嗱我而家做緊戲㗎，我飾演緊佢現任，真嗰位喺台下面。」

關楚耀及坤哥除了跟JW合唱外，更有兩男合唱的部份。做戲做全套，兩男合唱《男人信什麼》以外，更盡責的把「台詞」講完。「前度」遇上「現任」，關楚耀笑著勸導坤哥:「灝兒佢唔鍾意人做兵，唔鍾意人副眼鏡起霧。你記得帶佢食多啲好西啦。」坤哥亦搞笑回應:「我會帶佢去多啲嗰間有個靚仔男歌手代言嘅台式茶餐廳(茶木)㗎啦!」Kelvin急忙反駁:「嗰間唔係茶餐廳嚟嘅，係台式餐廳!不過我都好鍾意食!」令全場哄堂大笑。

愛情劇部份完結，JW搬出十八舞藝，又跳又唱，以電音為主調，演唱出《Runaway》、《Feel the Bass》、《Stupid Boil》。JW的音樂風格相當多變，除了舞曲以外，她直言:「我細個好鍾意聽迪士尼啲歌，好多人同我講我把聲好適合幫卡通片配音，不過其實我都係鍾意唱歌多啲。」台上氣氛一變，像是去了迪士尼觀看《Golden Mickey》般夢幻，JW唱出《Beauty and the Beast》等主題曲大騷唱功。

最後一節，JW唱出多首Hit歌《多少年》、《小故事》、《矛盾一生》，她笑言:「《矛盾一生》呢首歌令到好多女仔話要同男朋友分手。其實呢啲歌唔係要比大家分手，而係比大家反思。今晚有無男仔係陪女朋友嚟睇我㗎?」全場一片呼聲，JW續謂:「恭喜你哋呀!咁難捱都捱到!你哋捱過咗《矛盾一生》呢關，感情一定會好好!」在全場合唱下，JW回到台下，觀眾不停大喊Encore。

只此一場的演唱會，驚喜點止一個。Encore部份，鄭中基登場與JW合唱《我代你哭》，令全場尖叫。Ronald笑問她:「聽講你早排喺頒獎典禮講粗口喎!」JW只好哭笑不得回應:「我要重申我真係無!我係講死啦!」演唱會來到尾段，JW首次公開演唱新歌《維多利亞》，她特意鳴謝林奕匡為她作曲，並以《I Just Wanna Stay With You》及《安全感》作結。

接受《香港01》訪問時，JW表示自己上台前相當緊張:「我本身喺化妝室度緊張到抖唔到氣，跟住就想嘔啦。我覺得再留喺間房度會仲驚，所以就行咗出去，啲人都覺得好奇怪點解我會出到嚟。」問到她濕身唱歌那一部份，她表示:「其實真係好驚會冷親，綵排嘅時候真係好凍，不過到演出見到啲觀眾好支持，我就覺得好warm!」今晚JW演唱迪士尼一系列主題曲勁有驚喜，問到她會否在新一年做一些近似迪士尼的音樂，她不忘為自己賣廣告:「希望迪士尼今年會搵我唱主題曲啦!我真係好鍾意㗎哈哈!」