【專訪】首個華人超級英雄曝光　女鋼琴家黃子芳：為音樂放棄名校

美漫超級英雄之父Stan Lee筆下英雄角色無數，位位的背景也相當引人入勝，由攝影師到醫生、盜竊犯到富二代發明家也有。在角色的平凡日常和晚上到街頭儆惡懲奸之間，我們也能從中尋找到樂趣和共鳴。不過多年以來，Stan Lee筆下也缺乏一些華人超級英雄，就在今年，Stan Lee的個人工作室「Stan Lee’s Pow Entertainment」宣布即將推出首個華人超級英雄，更找來香港青年女鋼琴家黃子芳(Catherine)作為藍本，打造出一個「冰雪超級英雄」的故事。但其實子芳在成為「超級英雄」前，她的故事已是一個活生生的傳奇。
攝影：江智騫
Make Up：Annie G. Chan @ AnnieGChan makeup centre
Hair：Eric Chow @Xenter
Wardrobe：Whistles & Phase Eight from Rue Madame
Accessories：APM Monaco

首個Stan Lee打造的華人超級英雄

近日，Stan Lee的個人工作室「Stan Lee’s Pow Entertainment」宣布與香港的上市公司「承興國際」合作，打造出一個「冰雪超級英雄」系列，希望透過這個超級英雄，為2022年的北京冬奧作準備，讓更多人留意及認識冰上運動。有趣的是，這位「未見街」的冰雪超級英雄，變身前並不是一位冰上運動員，而是一位「冰雪鋼琴公主」。剛好，本港的青年女鋼琴家黃子芳便成為了這個角色的藍本，除了參考子芳的外表為角色設計外，該名超級英雄更會沿用黃子芳這個真實姓名作為本名。問到子芳為何會得到今次的合作機會，她謂：「因為今次嘅系列係希望可以帶出多啲中國元素喺當中，佢哋又知道我喺中國同國際上都會經常表演一啲民族音樂，例如用鋼琴去彈奏《梁祝》、《黃河》等等，所以佢哋認為我好適合呢個角色。」

超級英雄兼任音樂總監

今次的「冰雪超級英雄」系列雖然未公佈任何設定方案，不過已得悉作為英雄藍本的黃子芳，更會成為該系列的音樂總監。首次由演奏家搖身一變做配樂，子芳表示：「今次係一個好大嘅嘗試，因為作為演奏家，突然走去做音樂總監，其實係兩個範疇嘅專業嚟。所以我哋會成立一個好大嘅團隊去搜集中國傳統音樂元素，再放入今次嘅配樂當中。」而子芳更將於今年5月，親身到美國與創作人Stan Lee見面，詳談故事及劇本的細節之餘，更要商討音樂上的創作。以現時所知，今次的「冰雪超級英雄」將會先推出動畫，往後的日子會否推出電影作品，甚至讓子芳親身演繹主角，便要留意該作的動向。

關於黃子芳

作為80後的黃子芳，年紀輕輕便獲授予「英中音樂大使」的稱號，烏克蘭更頒發了「藝術成就獎」給她。在大家的心目中，可能認為子芳打從出生就是那種人生贏家，受家人悉心栽培成偉大的鋼琴家。但現實情況卻不如是，9歲開始接觸鋼琴，起步算是比不少人遲，子芳笑言自己小時候其實是一個「過度活躍」的小孩：「以前讀小學，學校規定每個學生都要學一樣樂器，當時我一年級又學一樣、二年級又學一樣，年年都轉，我阿媽就好頭痛啦，於是佢去搵我嘅音樂老師，想我固定學一樣。當時我恩師邱天虎教授不時都收到風話我係特別活躍，所以佢就要搵方法處理我呢個好動嘅學生。」

大概你想像不到，講求優雅、比賽及表演時有一套特定形體動作的鋼琴，如何可以困得著一個好動的小朋友，子芳道：「其實我老師嘅教學好隨意，佢本身係一個指揮，從來無彈過一粒音畀我聽，亦從來無示範過一首歌。不過當時嘅我好曳好為食，我成日買好多嘢食返嚟擺喺鋼琴上面挑機，彈一陣又問佢可唔可以食。佢又好隨意畀我食，當時我好奇點解佢同其他老師唔同，其他老師都唔會畀我上堂食嘢，於是我就問佢點解咁縱容我。」當時子芳的老師答她：「如果你食一粒朱古力，可以令你專心彈好一首歌，何樂而不為呢？」往後的時間，子芳學琴時可以隨意落街買零食，老師只叮囑她一句小心，便讓她揚長而去。老師有一套法則：「如果我半夜拍醒你，你都可以彈到一樣嘅水準，咁就代表你冇問題啦。」結果學了鋼琴半年後，子芳奪得兩個校際鋼琴比賽冠軍。

學琴唔等於考級，香港的音樂病態

黃子芳9歲初次接觸鋼琴後，並不如其他人般一直學下去，甚至連考級也不是一級一級上。她直道：「我考完二級就直接跳考八級，中間仲試過停咗五年冇彈，直至再學返琴嘅時候先決定要走專業路線。」世界的天才有很多種，一種是普通人認同的天才、一種是自認天才的天才、還有一種是天才公認的天才。如此說來，恐怕不少自認琴技不俗的人也不得不承認，黃子芳的確是一位天才，而子芳亦主張：「其實彈琴唔應該畀所謂級數去縛住自己，喺國際上其他地方都會有專業化嘅音樂學院，不過香港正正缺乏呢類型嘅教育機構，變相級數就成為咗學琴嘅唯一指標。我老師亦係從專業嘅音樂學院出嚟，級數喺我哋嘅學習過程唔係放第一位，反而係希望用音樂帶動自己嘅技術。」到底何謂以音樂帶動技術，在外人看來似乎很難明白，更莫講當年只有9歲的子芳。不過她卻謂：「深信無論幾多歲，有學音樂嘅人都會明白一件事。當你見證自己演奏嘅技術由0去到1，慢慢喺比賽、表演當中發掘到自己嘅才能，你自然會更用心去提升自己嘅技術。而每個人都有感情，例如小朋友睇電影見到有小動物過身，加上一啲悲傷嘅音樂，佢都會有感覺，我老師就係不停用一啲故事令我去代入音樂當中，慢慢就會知道，點樣演繹一首樂曲。」

放棄學業，專注音樂

眾所周知，在香港學音樂，盡其量也只會被視為「課外活動」，而非人生的全部。縱使天份高如黃子芳，在校時期也同樣面對過這方面的問題：「我嘅成長可能比較特別，例如俄羅斯咁，當地小朋友由幾歲開始已經決定好人生要行嘅路，然後修讀相關嘅專業，由細個開始接受訓練。而我作為土生土長嘅香港人，的確係起步較遲，當我真係決定鋼琴要成為我嘅專業之後，我發現我比人慢咗十年，好多基本功要從頭打起。於是去到中四嘅時候，我選擇放棄我嘅學業，每日用十個鐘喺琴房不停練習，最後先可以有今日嘅成績。」在香港當學生，放棄學業可說是「死罪」，子芳當年的決定又是否無後顧之憂？她憶述：「當年媽媽係反對，始終家長會好注重名校嘅身份，而當年我放棄讀名校，媽媽係覺得好可惜，加上屋企以前都說不上好好環境，佢會覺得入到名校係好難得嘅事，點知結果我又唔珍惜。反而爸爸就好清楚我嘅性格，我要做嘅事情，佢擋都擋唔到，所以佢睇法比較簡單，就係任由我去試，等我自己放棄。點知後來我越行越遠，佢哋就改變咗睇法，亦感受到我嘅決心。」本身立志成為香港其中一位偉大的音樂教育家，但始料不及，自己竟然成為了演奏家，更衝出國際，獲授予「英中音樂大使」及「藝術成就大獎」等榮譽，促進中國民族音樂及西樂的交流。