【劉德華演唱會】華仔大患初癒開足廿場跨年騷 8月中優先購票
撰文：洪曉璇
出版：更新：
舊年劉德華拍廣告時墮馬導致盆骨骨折而要全面停工休養，連帶原本舊年年底舉行跨年演唱會亦要取消，到今年初華仔終於宣佈年底會舉行20場聖誕同跨年演唱會，呢日終於公布演唱會主題名稱「My Love Andy Lau劉德華 World Tour」（中文：「我愛 劉德華世界巡迴演唱會」），仲分享一系列演唱會主題畫作。
華仔呢次用油畫作演唱會海報。
呢次除咗公布演唱會主題名稱外，亦正式宣布香港首站演出日期，將由2018年12月15日至2019年1月3日連唱20場，8月15號將會有首15場優先訂票。華仔話：「呢次演唱會其實係因為上次受傷後，就希望有一個重生嘅感覺。乜嘢類型海報都影過了，就希望有一啲新嘅嘢呈現俾大家。亦同公司講咗幾次，而李安修非常贊成我用繪畫的形式表現呢種想像，但仲未諗到要點做。」
劉德華親自邀請相識十多年嘅好友，藝術家曾梵志先生為其演唱會主題海報作畫。
華仔親自邀請藝術家曾梵志先生為其演唱會主題海報作畫，原來佢地已經識咗十幾年：「咁啱見到梵志於荷蘭梵高美術館嘅展覽，展出以梵高肖像為靈感嘅繪畫作品，得到啟發。所以就大膽鼓起勇氣，邀請梵志用佢嘅藝術角度，為我嘅演唱會主題作畫，估唔到梵志一口答應。其實同梵志認識咁耐以來，彼此都比較忙好少見面，而且無人諗過用咁藝術嘅方式為演唱會海報作畫，可以話係一個前無古人嘅創舉。」
華仔自己都有即席揮毫加入作畫。
+11