歌神許冠傑（Sam）一連三場的《許冠傑演唱會2016》，今晚於紅館開鑼。作為廣東歌的鼻祖，阿Sam一開場，就即時唱返首《鐵塔凌雲》同《獅子山下》。身穿紅白藍長外套的許冠傑在台上手執結他自彈自唱，而觀眾則打拍子伴奏。換上黑色花花皮衣的阿Sam，之後大唱《加價熱潮》及《半斤八兩》，期間又走到台邊與觀眾握手。「各位街坊老友，大家好！鍾唔鍾意呢個佈景？今晚係屬於香港人的演唱會，鍾唔鍾意香港？」

當阿Sam再次走近觀眾握手時，更賣大包，對於女粉絲的索吻要求來者不拒。穿上黑底白色中文字的西裝上場後，阿Sam表示要貓王上身，而且更叫埋徒弟Justin上陣，二人邊跳邊唱《佛跳牆》、《咪當我老襯》。寶刀未老的阿Sam之後化身情歌王子，在唱《柔情淚》時，將廿多條豹紋絲巾親手送予女粉絲，並且附上香吻一個，搞到台上啜啜聲不斷，絕對係人人有份永不落空。