李幸倪《GIN LEE MUSIC SUITE》第5擊　方泂鑌許廷鏗擔任嘉賓

世紀疫情持續，唱片公司和歌手都改變宣傳方式，不時舉辦網上直播節目，既維持曝光，亦可以藉此宣傳新歌，比如「唱家班」Gin Lee（李幸倪），近日積極籌備全新大碟之餘（新歌包括《幸福門》與9月25日派台的《美男子與香煙》），亦定期推出直播節目《GIN LEE MUSIC SUITE》。今晚（24/9）播出的第五集，主題是「男人KTV」，邀請兩位嘉賓亮相，分別是許廷鏗（Alfred），以及跟Gin Lee同樣來自馬來西亞的方泂鑌。

雖然今集以卡拉OK為主題，但Gin Lee坦言自己並非「咪霸」，又指與朋友唱K的氣氛尷尬：「啲朋友約咗我唱K，但係約完我之後大家又唔唱，淨係不停點歌、聽歌，我就問『點解大家唔唱？』但係朋友會講『你喺度點唱？』我通常等到太耐都冇人唱，就會唱一首歌先，有時大家真係會唔唱，有時朋友都會一齊唱。所以我比較少去唱，覺得大家唔會想同我唱K。」

Gin Lee先以《甘心替代你》及《你，好不好？》揭開序幕，又與方泂鑌隔空合唱對方的成名曲《壞人》。及後Gin Lee唱失戀歌《你還要我怎樣》時，直到最後一刻更忍不住流淚，她直言：「呢首歌啲歌詞真係好變態！」其後她又唱出《活著Viva》、《告白氣球》，更即席清唱一小段新歌《美男子與香煙》。

最後Alfred拿著果盤壓軸登場，並與Gin Lee合唱《勁歌金曲》。他談到選唱此曲的原因時指：「呢首歌好長，可以霸住間房，希望佢哋（卡拉OK）唔會cut鐘。K房每一分鐘都係好寶貴。（會唔會揀重唱？）有時唔得㗎！」