鄧麗欣Stephy正準備9月在澳門舉行的演唱會，而日前更高興宣布反應熱烈加開一場。不過原來宣布加場當日，Stephy自己就備受失聲困擾，昨日更拍片將這把磁性聲線「公諸共好」，不過從影片可見，Stephy雙眼通紅，一臉無奈。

Stephy將於9月20日舉行《STEP by STEPHY鄧麗欣演唱會》澳門站，最近積極備戰，但於昨日，Stephy在社交平台分享一條自拍短片，並寫上自己近日失聲。「兩日前 就係宣布演唱會加場那天　我把聲咁樣　所以心情非常複雜　不過放心 經過針灸之後 今日把聲好好多喇　要做好任何事情　健康都是首要　身邊好多朋友都病　大家真的要注意身體　祝願大家都身體健康」

而從片中聽到其聲線沙啞，聲量相當微弱，「好耐未試過把聲咁樣，唔知點解……之前咳咗好耐，原本就已經好番，但係呢突然之間……突然之間噚日練完歌之後，又咳番喎。咁咳完之後呢，今日就失聲喇……我係咪好性感呀把聲？」雖然Stephy不失幽默，但見她雙眼通紅，而且說話要花很大氣力，的確令人心痛。