黃淑蔓新歌《致未來的我》還原英國留學生活 同居密友MV終極曝光

撰文:關穎賢
出版:更新:

於英國留學的黃淑蔓(Feanna)因疫情關係,暑假返港後一直留港陪伴家人,遙距上課之餘亦繼續歌唱事業,更將留學與疫情期間的感受放入新歌《致未來的我》,由歌詞到MV都是她的真實經歷和感受。除了還原當地房間布置外,Feanna更重演隔離期間在房內玩雪櫃和躺著食薯片飲汽水的頽爆生活,而且她在英國的同居密友更在MV首度曝光。

Feanna更重演隔離期間在房內玩雪櫃和躺著食薯片飲汽水的頽爆生活。

原本在家中是小公主的Feanna,獨自出國留學後,自言學會獨立生活,尤其是疫情期間足不出戶,讓她有更多時間思考和了解自己,與新歌《致未來的自己》內容不謀而合,她說:「今次MV嘅故事係當一段感情結束,將自己收埋好好調整心情後,重拾自己,神氣地行出門口,離開呢個困境。導演將MV場景布置成我英國住嗰間房,專登搭咗個一樣嘅窗台,窗外都係會望到海和大樹。」問到隔離期間,Feanna在做什麼,她笑言:「可能比MV裡面嘅自己更頽廢,哈哈!其實喺英國都好少出街,平時都好似隔離咁匿喺房,但多咗時間諗嘢,幫助成長。呢個時期無媽咪煮飯執屋,學到獨立,照顧自己。覺得自己成熟咗,唔會好似以前咁容易被小事情打擊,希望末來嘅自己會更強壯,有信心成為更堅強嘅女人。」

Feanna坦言最初擔心到外國生活,人地生疏會好寂寞,所以瞞著家人在英國找了一個「伴」,這次回港為怕分隔兩地,特別帶「他」回來,Feanna擔心媽媽會抗拒,結果融入家中:「我先斬後奏領養咗一隻貓,我自細已經好想養貓,但媽咪有少少潔僻又話怕貓毛,唔准我養。我喺英國養咗一段時間冇講,但今次返香港唔知留幾耐,所以帶埋佢返嚟,因為我要隔離21日,貓貓就要交畀家人照顧,佢哋好快Friend咗啦!」拍攝MV當日早上懸掛八號風球,延至晚上才開工,Feanna帶著小貓拍攝,笑言「貴人出門風雨多」。