吳若希（Jinny）今日（5/11）現身尖沙咀，出席谷婭溦（Vivian）祝捷會，更獲對方送贈BB衫，以報答她向Vivian傳授練廣東話咬字心得。

吳若希接受《香港01》訪問時坦言自己見證著Vivian在音樂路上的高低起伏，對她得到好成績感到高興。說起之前教Vivian咬筷子讀報紙來練習廣東話，她憶起一點與Vivian交流練咬字方法的畫面：「其實係喺一啲好休閒嘅場合，係大家等緊埋位嘅時候，佢同我講起自己遇到一啲唔開心嘅嘢，我就同佢分享下細個嗰陣，我嘅伯樂伍樂城先生點教我練咬字，因為呢個方法係佢教我嘅。呢個方法會令你讀每一個字嘅時候都會特別用力，到你唔咬筷子嘅時候就會讀得好啲，冇咁容易有懶音。」

談起今年Jinny推出的作品主要以非劇集歌曲為主，她坦言自己感受到公司在音樂創作上給予的自由度更大：「唔好話係轉緊方向，我覺得係開放咗，畀多啲自由度歌手選擇。其實公司除咗我哋平日聽到嘅劇集歌之外，都一直有做緊其他類型嘅音樂，只係冇重點宣傳。依家可能會係重點宣傳非劇集歌曲，所以大家會覺得我哋轉咗方向，但係我哋一路都有做唔同類型嘅音樂。」