上年重新出發的林欣彤，除了在TVB拍《老表３》之外，推出歌曲《懸崖花》反應不俗，尋晚更在廣州個人音樂會《非彤凡享音樂會》，過千名樂迷逼爆場館，Mag坦言：「聽到掌聲好感動，喺我嘅追夢過程入面如果冇你哋，我上唔到今日呢個台。」

向來感性的林欣彤，再踏台板當然有說話要講，她說：「我知道成日有內地粉絲遠遠嚟到香港搵我，所以我想唱好多歌去報答你哋，好想見到你哋。每次你哋嘅熱情令我覺得無論幾辛苦都值得，因為有你哋陪伴我。多謝你哋，我嘅粉絲、屋企人同埋朋友，多謝你哋喺我最唔可愛嘅時候繼續等我、愛我，好感動，因為呢樣嘢好難，所以多謝。」

今場騷對Mag別具意義，事關首次進軍內地市場，難怪早前已經表示：「很期待」，為了以最佳姿態示人，本身已經很纖瘦的她更地獄式節食，尋晚以超貼身露肩晚裝示人，被樂迷大讚「好索」，全晚她表現穩定，更應樂迷要求玩問答遊戲，甚至有求必應，清唱出《If I Ain”t Got You》，事後更與樂迷影大合照留念。