好聲音2022｜李克勤冧莊連續兩屆奪冠軍導師　謙虛謂：運氣加敬老

內地音樂選秀節目《中國好聲音2022》日前（28日）播出總決賽，賽前一直被網民視為「中國好導師」兼冧莊「冠軍導師」大熱的李克勤順利勝出，成為唯一一位連續兩屆奪得冠軍導師的男導師！

在日前播出的《中國好聲音巔峰之夜》，最終由克勤帶領的學員梁玉莹奪得總冠軍，克勤亦同時成為冠軍導師。雖然克勤戰隊於最初的盲選階段一波三折，但最後戰隊都能夠完美成形，克勤安慰表示：「我嘅戰隊真係好完美，攻守兼備。」勝出比賽後，克勤笑說：「第一年攞我覺得係運氣，第二年攞就係運氣加敬老。」他表示要多謝團隊，如編曲的陳子龍，指自己的團隊是「一條龍」服務，包括髮型、形象設計等，又乘機多謝太太盧淑儀：「形象顧問就係我屋企嗰個形象顧問啦，即係我太太，佢都好開心，大家都睇得好投入。佢八月過咗嚟『好聲音』，其實學員着嘅衫或者所有嘢，佢都有負責幫手搞形象，大家都好投入咁去做呢件事。」

克勤坦言從不當自己是導師身份，跟學員們亦師亦友，凝聚戰隊團魂：「大家都冇分前輩後輩，都係一班享受音樂、鍾意音樂嘅朋友。除咗工作，大家都成日一齊食飯，從而建立起友情。」這次參加「好聲音」期間，他亦有跟上一年的學員聯繫：「我覺得『李克勤戰隊』兩年以嚟俾大家嘅感覺就係導師同學員嘅關係好融洽，就算今年我係第二年，我同第一年嘅學員好似伍珂玥或者賀三都依然有保持聯絡，『好聲音』係一屆一屆，但係老師同學員嘅關係係可以好長久。」

至於致勝策略，克勤表示自己是一個相信「老黎」的人，如去年贏得冠軍，今年總決賽他便特意穿回跟上年同一品牌的西裝作戰衣：「舊年伍珂玥唱《飄雪》，今年我哋學員都係唱《飄雪》，但舊年係唱陳慧嫻粵語版《飄雪》，今年我哋係唱國語版。最後嘅《祝君好》因為梁玉莹係廣西人，我亦都係中國香港歌手，都想保留番一隻粵語嘅歌，所以我哋特登將呢隻粵語歌擺喺最後。」總決賽完結後，克勤跟學員齊齊回到自己下塌的酒店齊齊開香檳慶祝。