《2022年度叱咤樂壇流行榜頒獎典禮》記者會今日（10/11）於昂坪市集舉行，MC張天賦與陳蕾（豹哥）於活動後受訪時均表示對獎項抱着平常心，但豹哥坦言，由第一年參加頒獎典禮開始都會寫定得獎感言：「有個準備，我寧願失望都唔想上台冇準備，我寫完上台講唔到就會出IG出咗佢，寫定個文字先。」MC同樣表示會有所準備：「點都要準備少少，但我就習慣打天才波多啲嘅，我覺得嗰下再真啲……都係平常心啦，你問我想唔想攞？想攞，但係就平常心啦。」

問到最想攞的獎項，MC直言是上年都成功奪得的「叱咤十大」：「希望可以keep住個成績。（男歌手獎呢？）梗係想攞啦，身為一個男歌手，梗係希望攞男歌手獎，我嘅目標一定係金，但慢慢嚟啦，畢竟我都仲算係一個新人，要啲時間成長下、浸淫下嘅。」至於誰是最強勁敵，MC說：「我覺得自己未必有男歌手攞，所以我應該唔係勁敵嚟。（睇好邊個？）我個人好私心鍾意Jay Fung（馮允謙）。」而豹哥就笑言「咩獎都想攞」：「男歌手都想攞埋」，亦希望有機會可以在叱咤頒獎台上一嘗唱Live滋味。