辦公室出軌很普遍!女生幻想不輸男生 面對刺激:別高估自制能力

撰文:
最後更新日期:

戀愛,有時只是一種氣氛,某些現實因素加上你自己的一些幻想,令一件普通嘅事變得「浪漫」。一時唔清醒,就好易會被呢種戀愛氣氛矇騙而做錯決定……例如係同同事出軌,即係自己/對方有另一半,但仍然發展感情。

作者:詩寧

(《金秘書為何那樣》劇照)

出軌很普遍,分別只係......

提到「出軌」,人人都會破口大罵,覺得當事人無腦、唔諗後果、一時鹹濕連份工都無埋……身為已婚人士,我當然認為出軌係唔啱,但當「戀愛氣氛」降臨喺你身上,你係咪又可以堅守對另一半嘅承諾?背著另一半,你真係從來無同過其他異性調情?幾句訊息都無?出軌很普遍,分別只係思想出軌定係肉體出軌,你離條軌又有幾遠?

相關文章:
【心理測驗】內心溫柔卻被誤會?如何從心機婊中突圍 展現內在美
威廉王子傳出軌凱特閨密 衣著看取態成熱話 凱特性格唔聽人講?

(《金秘書為何那樣》劇照)

「曖昧」可能只源於幻想?

出軌,並唔係男生專利,其實女生喺呢方面更易「做錯」,因為女生太愛幻想,而所謂嘅戀愛感覺,好多時都係自己幻想出嚟。唔信?

舉個例,某日你帶口罩返工,清潔姐姐喺茶水間問你:

「Jenny, 你病咗呀?唔好飲咖啡喇,飲多啲暖水知道嘛。」繼而佢斟咗杯暖水畀你。你講句唔該,最多都係感動一下覺得人間有情就完。但如果上述說話同動作係一個靚仔、斯文有禮、你一直覺得佢好有才華嘅高層對你做,相信你已經面都紅晒、心跳加速,因為你自己加咗啲感受喺杯暖水入面。所以「幻想」,係一件好危險嘅事。

(《金秘書為何那樣》劇照)

男女大不同:男生對自己的幻想累事

女生對男生的幻想,多數是源於祟拜、傾慕,覺得個男上司好叻,工作時候很認真,落決策時候又很有型,仲要教自己好多嘢……每日都為咗佢而扮靚返工,香港人返工時間長過拍拖時間,日日見面、天天幻想,好快就會唔記得咗自己有另一半。

那男生對女生的幻想呢?或者係對自己的幻想,覺得自己係英雄、自己好叻,見到女同事(當然前題係靚)工作上遇到困難,好似好辛苦好慘,覺得自己應該去幫下佢、保護佢,最初可能係分擔工作,漸漸由憐生愛。屋企個老婆太強勢也太獨立了,早已提供唔到英雄感。

【似曾相識?】點擊看最易促成辦公室出軌的6大情景==>

面對誘惑:別高估閣下的自制能力

辦公室出軌事件,仲有一項重要元素-刺激,因為唔可以畀其他同事知道你倆的秘密,喺人前、開大會時扮晒唔熟,眼神交流都唔多個,散會後返埋位密密Message;遇到節日,靜雞雞喺對方個位放份禮物仔;約咗放工食餐飯,但又要前後腳離開公司……愈多呢啲鬼祟小動作,愈危險,也愈刺激,貪玩貪新鮮,慢慢也就著迷了。

別以為自己不愛刺激,也別高估閣下的自制能力,唔想婚姻事業全失去,在職場遇到吸引力高的同事,還是一開始便敬而遠之好了,連朋友都唔好做。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。