文：洛迪高@世界波

皇家馬德里球迷閹尖就眾所周知，對於表現唔好嘅球員就更加唔留情面，噓你就噓你，C朗（Cristiano Ronaldo）都照噓可也。近來皇馬戰績唔好，球迷除咗準備定白手巾外，當然唔少得搵「黑綿羊」，即係網上講嘅「捉戰犯」。除咗對華倫西亞一戰頻頻失機嘅賓施馬（Karim Benzema）外（剛剛好近戰受傷缺陣），就係當初傳接近成億身價，可以用C朗合拍「雙億齊飛」嘅加里夫巴爾（Gareth Bale）就成為噓聲新主人，令人更懷疑今夏曾經身陷轉會傳聞嘅佢會唔會喺下年離開皇家馬德里。而家講轉會為時尚早，但巴爾喺皇馬進入樽頸期的確係事實，而如果佢唔能夠突破困境，佢喺班拿比路嘅前途就係咁先！

技術與位置之困

巴爾喺熱刺起朵時，最叻就係喺左翼發揮佢嘅速度及爆發力，但當去到皇馬，左邊係C朗拿度時，巴爾當然要屈就踢右翼。雖然要逆足，但由於隊友實力夠勁，而且踢法一樣強調速度，所以巴爾初期發揮都算唔錯，而且皇馬唔多踢落底傳中，對佢逆足發揮都唔會有太大影響，有時佢入楔都會射入靚波。佢喺皇馬嘅代表作當然係佢喺13/14球季，西班牙盃決賽「傳畀3秒後自己」，硬爆馬斯巴查（Marc Bartra）入巴塞隆拿波，而嗰場比賽C朗無得出場，而巴爾呢球波，係發生喺佢熟悉嘅左路。

及後巴爾甚至有機會移入中路擔當無鋒陣嘅中鋒，而佢喺國家隊更有時出現喺進攻中埸位置，但巴爾技術特別在於持球縱向跑動，而小範圍技術甚或背向龍門持球，都絕非佢嘅強項，所以佢出任呢啲位置時，一係選擇遠射終結攻勢，一係用速度突破。呢種技術正正係而家巴爾面對職業生涯轉捩點時遇到困境嘅主因，亦係佢面臨競爭時落後嘅其中一個原因，皆因其技術嘅單一性，萬一遇到針對性部署，或者遇上鐵桶陣，巴爾嘅特點都派唔上用場了。縱然近來佢都入唔少頭鎚，但佢需要更加豐富嘅入球或過人手段先可以繼續立足正選。

傷患之困

巴爾早前講過自己近來要食止痛藥先可以上到陣，正面回應對於佢狀態嘅質疑，亦為自己辯解，但無可否認嘅係佢嘅傷患對佢表現自己以及面對競爭時都絕對幫不上忙……如果唔能夠保持穩定上陣率，又點會有時間表現自己及為球隊作出貢獻？唔好忘記當時巴爾身價接近成億，皇馬球迷仲會唔會球隊養個藥煲？雖然巴爾喺對皇家蘇斯達時入嘅1球頗有以前7,8成功力及風采，但更重要嘅係，佢要穩定地有如此表現。

競爭之困

無論技術是否見底，喺皇馬陣中有大把球員等緊上位，唔理你用咩方法爭取表現，你交到貨，球迷滿意就有得出場。至於巴爾，唔止球迷唔滿意佢，最大件事就係佢嘅競爭者更得球迷歡心。喺佢嘅位置上，巴爾嘅主要競爭對手有華斯基斯（Lucas Vazquez）、阿辛斯奧（Marco Asensio），甚至艾斯高（Isco）都可以出任巴爾踢嘅位置。後兩者喺近況上唔止Fit，而且喺個人技術上比起巴爾更出色及多元化，近仗巴爾可以壓倒佢哋任正選已惹唔少爭議，而華斯基斯喺技術層面上同巴爾比較相似，都係衝刺勤力型，但華斯基斯係皇馬青訓產品，球會今夏出售莫拉達（Alvaro Morata）後，球迷已對於球會賣走自己人諸多不滿，如今見實力及狀態都不見突出嘅「外人」巴爾壓住正選已睇唔過眼，如果因為為巴爾已賣走華斯基斯就隨時暴動都似，因此巴爾現今可以講係面對緊外憂內患。

適應之困

「Me llamo Gareth Bale」（我係加里夫巴爾），呢句可能係巴爾最熟練嘅西班牙文。點解突然講西班牙文，因為有人將佢表現講成係佢仲未能夠適應西班牙生活，而且未係好精通西班牙文，可能只能夠同前隊友莫迪歷（Luka Modric）交流。不過筆者覺得呢種講法實在太穿鑿附會，尤其是卻奧斯及基迪拉等人都唔係十分精通西班牙語，但一樣獲得好高程度嘅讚賞，表現亦不受影響，所以呢個只係一個鬧佢嘅藉口，正如佢爆羸巴查嗰陣，同埋歐聯決賽加時入波嗰陣，有冇人講過呢樣野？

喺今年夏天，唔少傳媒都傳曼聯希望可以從皇馬手上購得巴爾（邊個夏天唔係？），不過無論係巴爾定皇馬陣營，似乎都唔打算就咁放棄對方，希望可以畀時間巴爾再次證明自己身價，過來人馬些路（Marcelo）就話，巴爾唔想畀人噓，唯有用行動令佢哋收聲。可惜，留畀佢嘅時間已經無多。

（文章純屬作者意見，不代表香港01立場。）