「禁色令」根本治標唔治本　市井趣味其實係TVB最大特色

隨著年代進步，當大家都講緊要思想進步，落力去對抗網絡23條，捍衛言論自由權利，但電視大龍頭TVB雖然今年已經係成立50周年，思想返而倒退返去500年前，前幾日大台嘅樂小姐出Notice畀所有藝員，人稱「限奶令」，文雅啲就叫「禁色令」，無論你點叫，開宗明義話公司唔鼓勵過份展示女性身材同賣弄性感嘅鏡頭，仲話如果一定要著3點式泳衣，會安排女藝員喺出面著多件T-shirt遮住。咁都仲未算，以後劇集有強姦或者床上情慾嘅情節，都要用「意會」嘅方式表達，意會？好抽象喎！

記得細個時候睇劇集，講到一啲有關性交的鏡頭，通常都會用行雷閃電，或者突然有包米穿咗咁去隱晦交代，依家如果仲用返呢條橋會唔會太Old school？都21世紀，如果劇情真係有需要，其實唔應該限制編劇嘅創作空間，咁係固步自封，如果真係覺得太過色情上唔到台面嘅，應該係由根本去處理，並唔係將啲情色情節用意會形色表達，咁係治標唔治本，講真色情遠遠唔止「強姦或床上情慾」，咁床外情慾又點計？

講到尾，其實賣弄色情係大台嘅「慣技」，由以前曾志偉嘅王牌節目《掌門人》又吸乒兵波又濕身誘惑又坐爆氣球，差唔多個個遊戲環節都係充滿鹽花，你話佢唔賣弄色情咩？但觀眾Buy喎，獎門人系列仲翻拍咗成十輯，長做長有！今時今日忽然連綜藝娛樂都被規範，著泳衣太色情？你用咩眼光睇先係重點，好地地去沙灘晒太陽要加件Tee？你叫一班去沙灘玩緊嘅90後少女情何以堪？咁男藝人谷肌又係咪色情呢？睇電視日日都見到陳豪森美除衫喎！平機會要唔要跟進跟進呢？以後節目一於要好似之前范冰冰套《武媚娘》咁，直接Cut畫面Cut晒事業線就最直接，齊齊回歸上世紀70年代，節目一於比內地更保守，今次TVB真係創潮流呀。真係要留名等睇下年大台香港小姐選舉，泳衣環節係變變晒做祖國罩面大媽。