「Tiny，幫我拎支筆過嚟！」只要主人Tommy一叫Tiny仔，牠就會乖乖地叼筆到Tommy身邊。Tiny並不是狗也不是貓，牠只是一隻雄性的侏儒兔。兔仔多膽小怕人，Tiny仔卻天不怕地不怕，更是香港少有的兔義工，跟隨著主人到處為弱勢社群送暖。

不少主人都會帶自己的毛孩去做動物義工，Tommy也不例外，但他所帶的義工不是狗不是貓，而是一隻侏儒兔Tiny仔。「每次帶佢去做義工都好囑目，因為全場得佢一隻兔仔，其他狗狗又hand hand又扮死，佢咩都唔識，最大賣點就係唔郁囉。」

好像上月他帶Tiny仔到家庭活動中心做義工，小朋友們都圍著牠不停轉，指牠「好得意，對眼好靚」。至於叼筆絶技，Tommy說反而好少在人前表演。「其實無刻意教佢。佢鍾意自己叼草食，有次將棵草換成支筆，佢又照叼喎，自此就識叼筆。」

從事管理工作的Tommy表示，自從10年前太太轉做兼職，因不想她太寂寞，就開始飼養寵物，現在家中除了有Tiny仔之外，他們還養了一隻哥基和7隻貓。「當年到金魚街走一轉，覺得兔子比較容易打理，就買了兩隻兔子，不過後來牠們都過身了。」

為牠開生日會Tiny仔是7年前由朋友送給他們，那時牠只有幾個月大，現在已算是老兔。「我哋會為佢訂造服飾，一套都要400元，每年也為佢舉行生日會，還廣邀牠啲狗朋友出席。」

兔子是弱小動物。在大自然中，屬食物鏈低層，對身邊事情會高度戒備，但Tiny仔卻不是這樣。兔子受驚嚇的話，瞳孔會放大，企定定，低頭不動，「但Tiny仔見到陌生人好輕鬆自在，就算响鬧市或跟其他貓狗一齊都唔驚。」Tommy說。兔仔體積比貓狗小很多，方便「收藏」，故兩夫婦經常帶著Tiny仔四圍去。「所以我們經常帶著牠四圍去，到尖沙咀鐘樓玩自拍、去商場shopping，拜年都帶埋佢去。」

兔義工助隱青

不少人以為兔仔沒有貓狗般有靈性，不明白牠做動物義工跟人類有何互動，但Tommy並不認同。「其實好多人會驚貓驚狗，但好少人會驚兔仔，所以每次帶Tiny仔去探訪，佢都好受歡迎。」

做了多年探訪義工的Tommy說，隱蔽青年要打破人和人之間的隔膜很難，但和小動物親近卻不然。「我曾經接觸一個女仔，成日匿响房瞓覺唔肯接觸人。即使社工去探訪佢，同佢講早晨，都唔會正眼望社工一眼。社工多次探訪後，佢終於願意到中心參加活動，有次我放Tiny仔响側邊，Tiny仔對藍眼睛眼定定睇住個女仔，好似可以同佢溝通咁。個女仔慢慢摸兔毛，仲肯同我有幾句交談。」事隔數載，女生走出隱蔽，更有另外一位當日被Tiny仔「輔導」過的女生，今日不但脫離隱青行列，還當上服務助理，反過來幫助其他隱青。「邊個話兔仔唔可以助人？」Tommy說。