預測颱風走勢不能忽東忽西 天文台台長岑智明：不跟「北京」
近年每年風季，不論是否風迷都會緊緊盯着各個氣象機構的電腦運算颱風路徑結果，趕緊發布打風消息。
天文台台長岑智明也看到這種情況，今年多次在其FB上載不同氣象機構的電腦運算結果，甚至同一機構不同日子的預測，以說明這些結果值得商榷。
作為香港主管香港氣象機構的負責人，岑智明指一個決定影響巨大，預測颱風不能胡亂跟其他「大台」，連「北京」都不跟，要有自己人腦跟電腦的判斷。這裏所說的「北京」，是指內地中央氣象台。
颱風鮎魚料將於兩日後進入香港警戒範圍，天文台與各主要官方氣象機構都預測它會於本周三在香港東面約400公里登陸，預測路徑幾乎完全統一。不過這種情況相對少見，8月初另一颱風妮妲來襲，天文台、中央氣象台、台灣中央氣象局、日本氣象廳、韓國氣象廳及美國海軍聯合颱風警報中心（JTWC），出現嚴重分歧。一直預測在香港東面登陸的天文台「獨贏」，其他氣象台尾段才「跟風」。
妮妲西登就是另一個「溫黛」
香港地理位置及地形情況，颱風在香港東面抑或西面登陸，影響十分懸殊，總括而言西面登陸比在東面，破壞嚴重很多。岑智明接受專訪時說，如果妮妲不是東登，而在掠過香港南方在西面登陸，以其威力及僅距離香港30公里，就是另一個「溫黛」。
作為官方氣象機構，岑智明指出天文台一個決定，影響重大，「民間嘅朋友，佢可以講好多唔同嘅嘢，好多可以討論，無問題，問題係天文台要睇住香港安全、大家部門要做嘢，唔可以話今日（預測）就4米風暴潮，聽日又話冇，唔得㗎嘛。所以真係要深思熟慮，靠人腦、預報員嘅判斷。」
歐洲預報中心忽然「改故仔」
岑展示主要機構對妮妲路徑預測的紀錄，當中包括公認可信性甚高的歐洲中期天氣預報中心（ECMWF）。他指該中心大致預測妮妲向西北移動，有一條路徑打正香港，有幾條打去東面，但也有一次預測吹襲台灣，「大家以為好有信心喎，歐洲中心話打埋嚟，8號（風球）啦，但係佢忽然間可以改故仔，改到『母雷公』咁遠，走咗去台灣，所以我哋一定要好小心考慮。唔係我哋求其整一個預測，對香港好大影響，唔可以立亂隨時改嚟改去，否則市民無所適從。」
他又列出美國氣象局和英國氣象局的電腦預測結果，時東時西，「有啲情況會擺西（預測西面登陸），去咗澳門、陽江嗰邊；但佢又有一個（預測）係向北喎、去到汕頭嗰邊，又係嗰個問題，究竟信邊個？」
預報要靠預報員判斷
上述預測往往只是直出電腦結果，「如果只係齋電腦，合埋眼，信晒佢，得唔得呢？好明顯就唔得。」他指不能只依據電腦作出預警，「今日就（預測）東面（登陸），（然後）唔好意思，今日就西面，依家要準備4米風暴潮啦、10號波；聽日又（預測）東面，咁唔駛（準備）啦。得唔得呢？咁唔得！」所以他強調說：「所以真係要深思熟慮，靠人腦、預報員嘅判斷。」
不過妮妲一役，其他氣象機構都預西登，惟天文台一直堅持東登，不跟大隊，博錯了獨贏變獨輸，會否膽怯？「唔係我一個諗法，幾個同事一路都傾住、商討住，大家意見都相當一致，唔需要就電腦（預測）撥來撥去即刻改，呢個都唔係理想！」
不跟中央氣象台、JTWC
「我哋唔會跟人哋啲中心，北京（中央氣象台）、廣州（廣東省氣象台）、海軍（指JTWC）呀。」要特立獨行，台長說最緊要看科學和判斷，「我哋係睇電腦客觀預測，大家共識係咪喺東面呀、中間。如果電腦改緊係穩定，大家一致話打正我哋，我哋都會改，你冇得頂㗎；但佢唔係嘛，一個話東，一個話西，一個話中間，你咪睇下邊一邊最多機會，最終我哋都係睇東面機會大啲。」
結尾，還是那一句，岑智明不相有李氏力場。「我聽講都有啲人話，整咗個大佛（昂坪天壇大佛）之後，好似香港冇乜大風災難，我就唔信呢啲嘢！我就係信機會率啫。」
