【武術01】梅姨姨,可否阻你18秒鐘看看信

撰文:
最後更新日期:

梅姨姨

可否阻你18秒鐘看看信

(唔識唱)......荷里活美不美?

(Getty Images)

其實唔係真係一封信,係想講返梅麗史翠普件事。

如果你唔知發生咩事,我大概講講。名演員梅麗史翠普喺接受金球獎終身成就獎嘅時候,有一段6分鐘演說。其中一有句係:「Hollywood is crawling with outsiders and foreigners. And if we kick them all out you’ll have nothing to watch but football and mixed martial arts(MMA), which are not the arts.」(荷李活就是有很多來自其他地方的人和外國人。如果要全數踢走他們的話,你將會什麼也沒有得看──除了美式足球和綜合格鬥,不過那些都不是Arts。)

如果你想睇全文,文尾有連結。(By the way,crawling with 唔一定係譯做爬行,網上《劍橋學術詞典》係解covered with or full of something。當然要形容班演員要struggle先上到位,所以用爬,都係得嘅。而MMA翻譯通常會係譯綜合格鬥。)

首先要講,我認同梅麗史翠普呢篇演說入面大多觀點,尤其模仿一個傷健記者去取笑他人係非常唔要得嘅事,一個有少少教養嘅人都唔會做。只係,呢篇文都係想集中喺一個位, 「 football and mixed martial arts, which are not the arts.」而因為我唔識美足嘅關係,我集中講MMA。

我先由Art呢個字入手,去講講點解MMA is an art。

MMA is an Art

Art呢個字,通常會解作兩個意思::

1.藝術
2.技藝、技巧

我估大家對第2個解法,應該無咩爭議,即係MMA係一種技藝。MMA需要練習,有使用嘅方法,亦有其工具性同目的性。如果鬭木(音鬥木,即係用木整嘢)係技藝,MMA武術都一定係。

問題出自於第一點,mixed martial arts係咪「藝術」?我會答係,絕對係。最直觀而言,MMA係一種身體藝術,不同嘅技術,身體嘅表現,都可以用美嚟形容,可以表現美感,就好似舞蹈係藝術一樣。

但係,究竟點先算係藝術?

咩係藝術

哲學家海德格(Martin Heidegger)喺《藝術作品起源(The Origin of the Work of Art )》中認為,藝術作品之所以係藝術作品,係因為佢可以「呈現出一個世界」。呢到講嘅世界,係指「意義網絡世界」,最簡單講,就好似「球迷世界」咁,當中嘅人同物係有意義關係。藝術,對海德格而言,就係「呈現出某個特定時間嘅某特定族群,以及對某一段歷史時期嘅世界所抱持嘅理解」。

呢個講法同列夫·托爾斯泰(Leo Tolstoy)嘅講法好似,佢喺1896年《什麼是藝術(What Is Art? )》中寫到:「藝術...是人類聯合的一種方式,把人們以同樣的感覺聯結在一起;生命及邁向個人和人類福祉中的必要物。」」(Art… is a means of union among men, joining them together in the same feelings, and indispensable for the life and progress toward well-being of individuals and of humanity.)

無論係因為熱血、定係欣賞拳手技術,MMA都可以將人拉埋一齊,就好似其他運動一樣。同時,MMA唔係「打爛仔交」,佢有規則,亦宣揚好多正確嘅做人觀念:例如,謙虛、堅強、勇敢、面對困難、勇於接受挑戰等等。

所以,武術絕對係一種藝術,MMA亦是。

想講兩點

喺呢到想講兩點:

1.對於唔太清楚嘅嘢,就用直接觀感去認知,例如格鬥就係暴力、憎恨,而睇唔到佢好嘅一面,呢種係一個好膚淺地去理解事物嘅方式

2.踩低他人嚟抬高自己,及踩低他人愛好去抬高自己愛好,唔見得有幾高雅同高明。呢一種做法,正正就係特朗普嘅行事手法,如果你唔認同佢,就唔應該用。

(Twitter 截圖)

佢都係直接話梅麗史翠普over-rated,踩低人嚟抬高自己。既然你憎佢,就唔好跟佢用。

背後原因

正所謂事出必有因,點解梅麗史翠普要搵MMA嚟講呢?網上有幾個講法:

1.梅麗史翠普係 Creative Artists Agency嘅藝人,同WME-IMG打對台。咁岩WME-IMG上年買咗UFC,而UFC係全球最大嘅MMA組織。所以,會搵MMA嚟講,係因為各為其主。

2.UFC主席Dana White有公開支持過特朗普。所以梅麗史翠普就對MMA唔順眼。

3.佢就係認為MMA暴力。

當然,用第1個可能去諗,難免有種陰謀論嘅感覺。我自己認為第2同第3個可能性就大D。點都好,呢件事去到MMA界,回響都好大,無啦啦俾人講一講,心中唔舒服就難免。除咗好多MMA嘅人都話返佢轉頭(其實於事無補),亦有較正面嘅情況,例如美國另一大型MMA組織Bellator 嘅主席Scott Coker,就話佢想請梅麗史翠普睇比賽,改變佢對MMA嘅睇法。

(Twitter 截圖)

點都好啦,搏擊運動係一件好正面嘅事,值得大家支持!


今日係咁多!

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。