▼疑因佔用公共通道爆罵戰

屯門美樂花園街市一名男檔主，懷疑不滿被指責佔用公共通道，手持摺凳與男保安唇槍舌劍，事發經過被人全程拍低。有網民報稱涉事男子與妻子二人在上址經營燒烤用品檔，事發時間為昨（22日）午約2時，片中開首可見一名男保安向「叉腰」男檔主稱：「你呢塊（牌）係私人嘅嘢嚟。」隨即獲一名拍片女子附和「係喇！私人舖頭私人嘢，公家嘅條路，點解佢可以擺？」並聲援男保安「唔使驚㗎！講法律㗎！」

▼檔主舉摺凳作勢打男保安

左邊衣袖捲起的男檔主聞言「輸人唔輸陣」，隨即氣燄逼人舉起「十大武器之首」摺凳，作勢要向男保安打去，拍片女子立即稱：「你扑佢吖喇！你扑佢吖！」男保安亦未有怯場，繼續理性勸籲涉事男檔主拆走相關物品，男檔主卻囂張爆粗回稱：「呢度係公家地方嚟㗎！唔好X同我講一定要拆呀！」期間一度有數名途人經過。

▼網民：退一步海闊天空

爭辯中途亦有其他保安員上前協助，拍片女子亦支援保安「唔好同佢嘈！我錄緊佢呀，我呢啲做證據嘅！」男檔主卻一於少理，繼續囂張爆粗回應「影清楚啲，影靚啲，臭X！」其後他則怒氣沖沖拿走摺凳消失於影片中。事件引發網民熱議，有人認為涉事男檔主「態度惡劣，不會幫襯。自己唔守規矩仲用暴力恐嚇！」亦有人勸籲香港人「退一步海闊天空‥‥‥和氣生財」。警方則指暫未接獲相關報案。