【讀者短篇創作】成為首富不滿足 決心成仙卻發現這件事更重要…
【文章原刊於01撐場,歡迎下載香港01 app,與更多作者一同討論喜愛話題。】
我呢一世,乜都有。
一個鄉下仔變成世界首富,今日我有權有錢有地位,但我未滿足。
或者,就係因為從來唔滿足於現狀嘅心態,先令我一步步向上爬。
好似無數古代帝王一樣,人間嘅成就去到極點,仲可以追求乜野?
我決定,我要成仙!
集中無數專家嘅努力同實驗,終於研製咗一粒仙丹。
我食咗,眼前一白,就發現自己去咗一個鳥語花香嘅地方。
一個白衣靚女笑住同我講:「恭喜你,你已經成仙啦,有晒仙人嘅超能力,包括隨意改變樣貌、長生不老、永遠唔會病,仲識飛添!」
我輕輕一跳,果然飛起咗,嘩,都話我呢個人做乜都成功。
飛吓飛吓,突然間俾交通警截住咗。
「先生,你無視交通燈嘅指示,違反交通規則第135條,要罰款……」
我幾乎懷疑自己聽錯:「咪住先,我依加係仙人,我識飛,都要睇紅綠燈?」
交通警撇撇嘴:「呢度個個都係仙人,個個都識飛,交通規則就係針對飛行而設架。」
交通警再望下我,放軟語氣:「你新黎架?我估你都無錢交罰款啦。」
我無錢?我堂堂世界首富無錢?
咪住先,呢一刻我好似真係無錢,人間嘅錢,都帶唔到上仙境。
交通警拍下我膊頭:「你好彩啦,我地岩岩推出新手優惠,無錢交罰款嘅新手,只需要喺臉上蓋個印作懲罰。」
車,作為仙人,我可以隨意變樣,蓋個印有乜所謂?
我就乖乖俾佢蓋咗個「交通安全最重要」嘅印,
交通警偷笑:「啊,唔記得話你知,就算轉換樣貌,個印都消除唔到。」
我呆一呆,交通警哈哈大笑:「個個都可以變樣,個印梗係用特製墨水架啦。不過你放心,三日後就會自動消失。」
交通警走咗,我死死氣氣咁繼續飛,順手用法術變到自己鬼咁靚仔,
但一入城,全部都係靚仔靚女,直頭同眼同鼻同醫生咁。
見到好多人臉上都有交通安全印,我心理先平衡啲。
唉,我做咗首富咁多年,人人都巴結我,真係好耐無受過委屈。
我領悟到一個道理,個個仙人都有仙術,想用仙術黎攞著數,係無可能嘅。
但就算起跑線一樣,我仲有絕頂聰明嘅頭腦。
喺人間,我一個鄉下仔做到人上人;喺仙境,我一樣可以做仙上仙!
這就是自信。
我調整好心態,躊躇滿志咁喺仙境搵工。
日子耐咗,我發現仙境同人間都差唔多,只係大家都唔會病,唔使睇醫生囉。
但你想食好住好、想人地睇得起你,一樣要搵錢、向上爬。
而更糟糕嘅係,我引以為傲嘅智慧,喺仙境居然不值一提。
甚至我搵工果陣,講我喺人間嘅成就,個HR嗤之以鼻,反問:「你知唔知我地經理貴姓啊?」
牆上有一堆相,HR指住其中一張細相,下面寫住Ying Zheng……盈鄭?
「嬴政啊,人間叫開佢做『秦始皇』。秦始皇喺我地公司,都只係一個部門經理。」
HR翻白眼:「你覺得普通人會有資源成仙?做到神仙,至少都係王侯將相,邊有傻仔架?
最多有幾個官二代皇二代,靠父蔭成仙,咪喺門口乞緊食。」
我俾佢講到一文不值,最後當然無請我。
唉,我痛定思痛,由工人做起。
好彩啲王侯將相養尊處優,無乜人肯服侍人,我就放低身段,搏命擦鞋。
但我每一日都喺度諗,好地地,我點解要成仙?
有大老闆唔做,黎仙境做工人?
我人生做過最傻嘅決定,就係求仙,雖然有秦始皇陪我一齊傻,但我依然咁後悔。
假如有機會番人間,我一定要出番本《仙境的黑暗日子》。
中心思想好簡單,就係你希望成仙後會有啲乜?
如果仙境乜都無,無人無Wifi,得鳥語花香嘅美景,悶都悶死你;
如果仙境有其他人,咁咪同人間一樣要競爭。
如果你幻想,成仙後有一班美女服侍你,
咁就要用吓腦,仙境嘅美女都係仙女,大家平起平坐,點解要服侍你?
唉,唔好睇我講到咁有道理,全部都係血的教訓。
奮鬥咗幾十年,我終於上到位,成為仙境嘅重要人物,係眾人巴結嘅對象。
兜兜轉轉,又回到原點。
直到有一日,有個道士打扮嘅人黎搵我:「大人,到咗您呢個地位,肯定覺得無乜追求,我最近研發緊一種道術......」
得得得,我知佢要講乜,當年我就係聽咗個道士講,結果成咗仙。
道士見我無乜興趣,好心急咁講:「呢種道術會令您成神,『神』係比『仙』更高級架。」
更高級?我聽到都嬲:「即係我要去一個新地方,再努力過?再捱幾十年?」
蠢咗一次,點會蠢第二次。
道士解釋:「做咗『神』之後,要選擇保留『仙』其中一樣超能力。」
「得番一樣,仲叫高級咗?」
道士神祕一笑:「但你可以番去人間......」
我呆一呆,即刻喺腦海計算呢件事嘅好處,
乜野識飛長生不老,喺仙境根本唔算超能力,人人都有,一啲都唔「超」。
但如果我可以帶其中一樣番去人間,稱霸天下……絕對唔係空想!
研究咗一輪,我決定投資道士嘅計劃,個計劃叫做「創造起跑線」。
無錯,唔係叫乜野「成神之路」,
講乜野成神成仙,我追求嘅,只係贏在起跑線。
世界上根本無好同差,好過身邊嘅人,就算係「好」;
如果個個都識穿越時空,剩係識飛果個,叫做「廢人」。
作者簡介:陳美濤
中文系畢業生,本地小說作者,以「貼地荒誕」為創作路線。對武俠小說情有獨鍾,喜歡分享個人見解。已出版小說:《無緣化蝶》、《港女九陰真經vs女神孫子兵法》等等,另有主持「口述武俠」影片頻道。
作者Facebook專頁:https://www.facebook.com/tomato28
想分享作品給更多人看到? 請即下載香港01 app到01撐場發表精彩創作!或將作品電郵至ugc@hk01.com,隨時敬候來鴻!
【編按:文章題目為編輯所擬,原題為「做咗神仙之後 [短篇小說]」】
(以上文章內容均屬用戶提供,香港01不為任何用戶內容而衍生或遭受之任何損失或損害承擔責任。)