【讀者創作.短篇】合法「唱衰」前度 評分制度下無人敢出軌?

撰文:
最後更新日期:

現實中每個人分手,或多或少都希望會向下一個伴侶隱藏上一段感情的事,例如某些缺點改過後,也不希望現任知道過去自己有多不堪。但如果有朝一日,過去感情史和前度評分會被現任看光光呢?

【文章原刊於01撐場,歡迎下載香港01 app,與更多作者一同討論喜愛話題。】

今日,我同女友分咗手,原因係我去滾,第四次被佢發現,

佢覺得「事不過三」,所以堅持同我分手。

點解事一定不過三,唔可以不過四呢?

唉,中國人納妾納咗幾千年,一夫一妻唔夠一百年,點解我就咁黑仔撞正咗?

好啦,呢個都唔係重點,

重點係,呢位前度女友,將我份問卷填得好差。

五年前,因為太多人為情自殺,

為咗辨別情場騙子,實行「分手問卷制」,

每對情侶分手後,都要為對方評分,畀下意見。

即係好似你睇完舞台劇、上完堂,都要填份問卷評下分咁。

而評分會喺網上公開,只要上評分網,搵對方個名,就會睇到佢所有前度畀佢嘅「平均分」。

為咗辨別情場騙子,實行「分手問卷制」,每對情侶分手後,都要為對方評分,畀下意見。(gettyimage/視覺中國)

呢個做法,真係減少為情自殺嘅個案,

我覺得最重要嘅原因係:有得發洩。

分手後,有個合情合理合法嘅途徑,畀你唱衰個前度,

仲可以影響佢之後溝女,真係太完美。

仲使乜死?放長雙眼睇佢點折墮啦。

呢一刻,我就係折墮果個。

睇住自己嘅「情人評分」愈黎愈低,講幾多甜言蜜語,女仔都唔信我。

咁我仲可以揀乜野?

無幾耐,我同咗Candy一齊。

Candy,係一個情人評分同我一樣低嘅女仔,算得上「門當戶對」。

所以我都預咗戴綠帽,食得咸魚抵得渴嘛。

我都預咗戴綠帽,食得咸魚抵得渴嘛。(Priscilla Du Preez/Unsplash)

點知一齊咗三個月,Candy都未有任何「惡行」,甚至無好似我啲前女友咁,到處查探我嘅行蹤。

Candy嘅表現,簡直係完美女友,同評分不符。

我忍唔住開門見山問佢:「明明妳無出軌,個人又好相處,點解前男友畀妳咁低分?」

Candy笑笑口:「其實我有去滾,你無發現啫。」

我無嬲,因為我都預咗,作為同道中人,我更有興趣知佢點樣瞞住我。

原來,Candy嘅祕訣,就係三個字:唔、心、虛。

出軌嘅人點樣被發現?捉姦在床、喺時鐘酒店門口撞到?

No、No、No,意外被發現嘅機率,其實好低。

通常係眼神閃爍、匿埋傾電話、刪訊息,露出蛛絲馬跡,引起對方懷疑,先開始查。

Candy就將出軌變成普通習慣,好似同個朋友食飯咁,無多餘解釋掩飾,坦坦蕩蕩。

「點解我評分咁低?因為我鍾意講真話。」Candy好苦惱:「如果男友三五個月都唔發現我出軌,我又忍唔住想坦白。」

「男友就會質問我,幾時幾日出軌,個第三者係咪好過佢。

我就一五一十咁分析,第三者有乜野好過佢,乜野差過佢......佢地惱羞成怒,分手後就畀零分我。」

「男友就會質問我,幾時幾日出軌,個第三者係咪好過佢。我就一五一十咁分析,第三者有乜野好過佢,乜野差過佢......佢地惱羞成怒,分手後就畀零分我。」 (gettyimage/視覺中國)

嘩,佢呢個苦惱樣,好似一個衰男人,但點解我覺得格外迷人?

「發現妳出軌後,我愛上咗妳。」

世上有千千萬萬人講過「我愛妳」,但我估,無一個人會咁樣講。

「我係花心,好似見到新餐廳,總係想試一試咁。」

我望住Candy:「我以為出軌一定要遮遮掩掩,但妳嘅理直氣壯,令我覺得......好神聖。」

原來尋尋覓覓,我一直尋找嘅,係一個賤格過我嘅女人。

自此之後,我同Candy幸福快樂咁拍拖,偶爾交流下出軌歷史。

我太沈迷Candy,慢慢都無再出軌,專一對佢好。

點知Candy話我愈黎愈悶,提出分手。

「對唔住,我會出去滾架,妳唔好走。」我無諗過,我都會有求復合嘅一日。

Candy好決絕咁離開,但佢留低咗一份禮物畀我:滿分嘅分手問卷。

「如果男友三五個月都唔發現我出軌,我又忍唔住想坦白。」(gettyimage/視覺中國)

為咗鼓勵浪子回頭,系統設定,愈近期嘅分手問卷,佔分愈多。

Candy呢份問卷,大幅拉高咗我嘅平均分。

我可以溝番分數正常嘅女仔,但係我無。

我專門搵啲「情人評分」極低嘅女仔,因為我意識到,我鍾意嘅就係衰人。

我發現,男人對前度一般比較寬容,除非戴綠帽,否則好少畀低分。

男人鍾意吹噓前度幾好幾靚,證明自己有魅力;

女人傾向講前度幾衰幾賤,令自己楚楚可憐,分手亦係逼於無奈。

皇天不負有心人,有咗情人評分嘅幫助,我終於搵到花心嘅女人。

男人鍾意吹噓前度幾好幾靚,證明自己有魅力; 女人傾向講前度幾衰幾賤,令自己楚楚可憐,分手亦係逼於無奈。(Kelly Sikkema/Unsplash)

但係,我陸續拍咗三五次拖,都唔太開心。

明明佢地都好花心,亦有一套獨門出軌心得,但我就係無果種感覺。

我地以為,自己搵緊嘅,係一類人。

其實我地一直尋找嘅,只係一個人。

我要搵嘅,只係Candy,無一種計分制,可以代表到一個人。

作者簡介:陳美濤

中文系畢業生,本地小說作者,以「貼地荒誕」為創作路線。對武俠小說情有獨鍾,喜歡分享個人見解。已出版小說:《無緣化蝶》、《港女九陰真經vs女神孫子兵法》等等,另有主持「口述武俠」影片頻道。

作者Facebook專頁:https://www.facebook.com/tomato28

想分享作品給更多人看到? 請即下載香港01 app到01撐場發表精彩創作!或將作品電郵至ugc@hk01.com,隨時敬候來鴻!

【編按:文章題目為編輯所擬,原題為「分手填問卷 [短篇小說]」​】

(以上文章內容均屬用戶提供,香港01不為任何用戶內容而衍生或遭受之任何損失或損害承擔責任。)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。