總商會160+1周年會慶 吳宗權登《工商月刊》封面｜溫多娜
撰文：溫多娜
出版：更新：
本港疫情反覆，許多實體活動都受到影響。但近日疫情略趨緩和，溫多娜自己亦都出席咗唔少活動。
前晚香港總商會搞咗個別開生面嘅晚宴，慶祝佢哋因防疫措施而推遲咗一年嘅160+1周年會慶，現場嘉賓雲集，特首、財爺及一眾高官都有捧場。總商會老友同溫多娜講，開場時有澎湃激昂嘅鼓樂、璀璨奪目嘅煙火，晚宴全程仲有管弦樂團伴奏，堆沙畫表演等等，好不熱鬧。
不過，唔好誤會商會違反咗嚴禁現場表演嘅防疫要求，皆因咁精彩嘅節目都係透過屏幕欣賞，但無損來賓熱情，滿場都係此起彼落嘅歡呼聲同埋掌聲。
難得160+1周年，現場設有五彩繽紛嘅許願板，畀來賓寫上對香港滿滿嘅祝福，佢地仲可以「登上」總商會《工商月刊》封面。晚宴貴賓之一、會德豐主席兼常務董事吳宗權便做了一次封面主角，十分型格。
疫情爆發近三年，難得開始多返實體活動，畀大家鬆一鬆，實為好事！