提到剪頭髮，年少氣盛的時候，面對着髮型師的問題「想點剪」，總有「講不出聲，講不出聲」的難堪心情。髮型師每日應付數十客人，剪髮生涯總會遇到些「極品」。帶明星相去剪已經算平常事，「最奇怪是，有人帶杜拉格斯張相，要求你整到一模一樣」，除了忍笑之外，下一秒便要順應客人，落手剪出要求。

【點擊「全螢幕」觀看影片】

潮流興「油頭」，其實是男士的經典髮型，明顯地剃出側分線，將瀏海上梳並露額，俗稱「飛機頭」。而專為男士而設的Barber Shop（男士理髮店），越開越多。就連天水圍也有一間充滿格調的890 Brothers Shop，當走進髮廊，就似時光倒流一樣，充滿古色古香。

客人拎相　要求剪杜拉格斯髮型

三位髮型師，Angus、Steven及Hunter三人去年在天一商城開設Barber Shop，可能會有疑問「天水圍咁隔涉…?」，但老闆們指「有人住港島都過來剪」，同時極受區內人士歡迎。當被問到古怪客人時，老闆們都笑成一團。「最奇怪嘅，一定係攞張相係卡通片人物」從事髮型師近廿年的Angus忍不住笑，「係杜拉格斯，佢一定要你整到嗰個頭一樣，但我冇笑，我暗瓦底笑，我啲同事全部笑晒」，這個畫面注定成為經典。

幫客人洗頭　「啲水係黑色嘅」

Angus一講再講「做學徒時見過一個古怪客人，佢嘅頭髮好長嘅，每個星期都來舖頭洗一次頭」，怎料，該名客人「佢真係一星期先洗一次頭，佢喺屋企係唔洗頭嘅，同佢洗頭的時候，佢啲水係黑色」，所以該名客人一踏進店舖，「一見到佢，個個junior都走後門，睇吓邊個唔好彩」。

自己剪衰個頭　找髮型師求救

有種客人，就是「可能自己買咗電剷，自己將側邊剷到好高，來到就會話有冇得救，執唔執到」，Steven說畢，Angus隨即說「有啲真係救唔到，冇得救」。即使即場未能完全化險為夷，便建議留長一點再回來。Steven又指，無論是甚麼類型的交流，也非常享受與客人傾談的，「我鍾意同個客傾偈，傾完就知道佢諗咩」。

「其實我哋髮型師好似心理治療師一樣」

髮型師除了剪髮之外，聊天也是一大職責，有時也需要打開客人心扉，Angus指「其實我哋髮型師好似心理治療師一樣」，不過，即使是比較稔熟的客人，也不可亂說話，「有時真係直接得劑問佢，點呀你同女朋友，但佢剪剪下頭髮喺度喊」，導致Angus手足無措，「冇呀，畀紙巾佢」。