大學最常見嘅教學工具就係PowerPoint，但其實佢係教學毒藥！試諗吓，當你每日上堂都係對住個PowerPoint，啲教授同啲同學一係就用點列式，一係就長篇大論，簡化成個施教以及學習嘅模式，所以對學生點都係百害而無一利！所以啲人話PowerPoint令到教學變到好悶、學生變蠢真係無講錯。

過期大學生曾經的大學生，80後老鬼，身老心不老，自問玩盡大學3年，勁爆回憶同美好經歷，足以講足30年。

大學生上堂前必到地方，除咗係Starbucks或者Pacific Coffee，就一定係電腦室，因為上堂前Print notes是常識。

大家來來去去都係印PowerPoint slides，一頁印六格會唔會太細？定印四格可以寫筆記？但係呢啲嘅問題真係好無謂，因為用PowerPoint教學真係好荒謬！但最荒謬係，教授開唔到電腦就上唔到堂，好似啲知識喺電腦而唔係喺人腦咁。

更多關於大學生的內容

【Ocamp獸父出沒？】做過組爸　經歷可以講一世

【大學生】O Camp係去玩定畀人玩？　去親嘅都係傻仔

【大學詭探】八大好猛？　大學鬼故有冇你嗰間？

PowerPoint令人懶於思考

PowerPoint嘅本質就係簡單直接，全部由點列式陳述重點。但係咁樣一嚟謝絕複雜嘅議題，二嚟精簡、點列式嘅方法其實好限制Presenter嘅內容，鼓吹列出個人認為嘅重點，好容易就會變成教授自己嘅睇法，而學生亦都好容易照單全收（大佬，你考試啲嘢都係呢度嚟，學生梗係只讀你個Slide啦）。

筆者曾經都見過有人喺論文quote教授睇法，雖然冇對錯之分，但會限制學生吸收知識嘅方向，唔要得。

而且教學唔應該係向學生提供重點，而係向學生拋問題，令學生自行去理解事情背後的原因、經過、結果，知識先會入腦。

教授喺未拋問題之前已經講埋解決方法，咁學生仲點會諗多一步？所以啲學生學埋就係bullet point，好簡單直接咁，咩問題就係嗰啲答案。而家啲新式另類PowerPoint，例如Prezi、SlideRocket、Impress，係就係好靚，但只會助長咁懶嘅教學模式。

教學太單向無助交流

加上PowerPoint嘅教學真係太單向，由教授透過讀slide上嘅知識畀學生聽，完全唔可以有助互動交流，學生掛住抄教授講嘅嘢，根本未有時間思考，單單喺一版slide之後問句「有冇問題？」係唔夠時間畀學生去理解啱啱究竟學咗啲乜。

更重要係，一堂一個PowerPoint，教授想灌輸晒佢所知嘅畀你識，結果係成堂得佢講，而你，早就已經瞓着咗。

就連置國際大公司Amazon同Linkedin的公司會議都已經禁絕PowerPoint嘅出現，哥本哈根商學院都話唔用，但喺香港孕育下一代精英嘅大學就仍然用最老土嘅方法，所以話大學生無創意、因循守舊，都係上一代造成。而PowerPoint最折磨人嘅係，你明知佢今堂要講三十個slides，然後成班一直衝到尾，但唔知自己聽咗啲乜，然後就夠鐘落堂。

你都想成為開筆一份子，稿件可電郵至opener@hk01.com；文章純屬作者意見，不代表開罐立場。