遊戲《爐石戰記》香港選手「一抽入魂」，是香港首位晉身世界賽的爐石玩家。為了打機，他花了18萬修讀中文及哲學雙碩士課程，原因是......
【點擊「全螢幕」觀看影片】
如果你有玩過《爐石戰記》
又有留意比賽消息
可能都聽過香港選手「一抽入魂」大名。
這位機齡只有3年的爐石電競選手，
是香港首位贏得爐石亞太賽的玩家。
「一抽入魂」真名鄧凱丰，
一般人總認為「打機無出色」，
但他是浸會大學中文系畢業，
而且為換取家人支持，
爭取多兩年時間追尋打機夢，
他攻讀了雙碩士課程。
不是「晒命」，
他認真地說：
「如果讀書差反而無後路，
可以放手一搏，all-in打機」。
鄧凱丰的電競夢去年開始，
於亞太區台灣春季資格賽中奪得冠軍，
並獲不少電競公司招手，
「有人叫我去台灣嗰邊打比賽，
但我始終唔想離開香港」。
他現與本地電競公司MTGamers合作，
成為半職業選手。
電競手的日常不外乎三件事：
做網上直播、練習、比賽，
鄧凱丰認為比起就職，
讀碩士可獲更多時間練習
「一個朝9晚6嘅打工仔，
再無心力擺時間喺打機」。
作為家中的獨子，
與父母年齡相距40多年，
老來得子使家人對他寄望很大，
「佢哋希望我做公務員、生活無憂，
唔信我打機可以搵到食，
覺得只係搵快錢......
但如果我讀住書，
咁佢會覺得反正我個仔仲讀緊書，
咁佢有啲娛樂都仲合理，
容易接受到」。
花18萬學費換來時間打機，
鄧凱丰亦自覺奢侈，
所以把電競所賺的錢都用來繳學費，
「呢兩年係我任性嘅期限」。
說起家人，
他眉頭緊皺，
心頭湧起一陣內疚感，
「都真係唔啱嘅，
無所事事一個廢青，
你打機打到朝早6點先訓，
阿爸就每朝6點出門口做嘢」。
但在追夢與孝順之間，
他希望兩者兼得，
「我認我係貪心嘅，
又想打機、又想讀書做孝順仔」。
為何要堅持下去？
「自大啲講句，
我唔想嘥咗自己嘅天份，
電競係一個夢，
每個男仔一打機就變會細路仔，
幻想有日成為世界舞台下嘅主角，
台下的人為自己歡呼，
好希望可以再入一次世界賽
打返一個自己心目中嘅成績
我就差唔多可以無憾離開呢個舞台」。
去年他贏得爐石亞太區冠軍，
成功取得世界盃聯賽資格，
可遠赴美國與國外其他選手比拼。
可惜，時不與他，
因簽證未能及時批出，
他被迫放棄參賽資格。
「明明個機會擺喺面前，
我係有啲唔甘心」。
鄧凱丰說打比賽從來不帶女友，
「佢喺度會心掛掛，
驚影響自己表現」，
但揚起的嘴角卻透露一絲甜蜜，
因為人雖不在場，
但女友Ida總會緊守在直播螢光幕前看他比賽。
男仔沉迷打機注定激嬲女朋友？未必。
談起Ida為他學玩《爐石》，
「都幾感動，對一個毒L來講，
有個肯陪你打機的女朋友係夢寐以求」
二人最多拍拖活動就是宅在家，
「一個星期可以幾日唔出街
各自喺屋企skype住打機、傾偈」，
就連當初表白也是打住機講。
Ida：佢打打下爐石突然間講「你可唔可以做我女朋友呀」
鄧：
Ida：嗰下真係嚇親我
鄧：唉，其實係咁嘅，
你知毒L對呢啲好有幻想，
本身諗住買下啲花呀汽球呀，
喺啲好風和日麗的黃昏，
或者月黑風高的晚上，
可能求其喺個公園呀，
整啲蠟燭，砌啲唔知咩形狀，
本身已經籌備緊，
點知唔小心爆響口，
唔通講句冇嘢啦，
我下個禮拜再話你知呀，
唯有頂硬上囉！
Ida：我打字應返佢
鄧：然後用咗2個鐘喺skype打幾個字
Ida：邊有咁耐呀
鄧：佢答「我都好鐘意你」，
哈哈哈，我明爽！
港女可能總讓人感覺拜金，
男友以電競作為事業，
怕不怕無錢途？
Ida說：「有得食有得訓開心就夠，
我覺得好自豪，
有個咁有夢想的男朋友，
佢明知依條路難行，
佢都選擇左繼續去做，
佢曾經同我講過一句說話我印象幾深刻嘅，
佢唯一覺得自己生存緊的時候，
個心跳得好快的時候，
就係喺舞台打比賽的時候，
佢喺電競路上一個人作戰好孤獨，
希望可以陪下佢。」