麥當勞12款已消失食品 懷念咖喱漢堡賣相？將軍漢堡醬汁？
麥當勞相信大家都不時食，外國就有人為了一包四川麥樂雞醬，換走自己的私家車。你又有否想念以下12款已經消失的麥當勞食品？又有那一款食品，你願意用一輛私家車來交換恆常售賣？
1. 飯tastic（2006）
提起飯tastic呢個名，諧音食「fantastic」，仲記得當年英文老師見到全城飯tastic有啲驚，不斷提醒「fantastic」讀音非「飯tastic」，千祈唔好讀錯。
講返個包，當年有個用飯做嘅包，雖然舊飯勁易散，又唔知點解好油，但整個概念的確幾新鮮。當時飯tastic更和世界盃一同宣傳，食滿$17就可獲一張列強卡，如果你手上列強卡嘅國家贏咗波，下一日仲可以去換小食！不得了！
另外，飯tastic廣告更找來衛蘭衛詩兩姊妹拍攝，你又記得那個急口令嗎？
「飯tastic巴巴閉，秋田小町優質米， 新鮮生菜至矜貴，脆雞牛肉好架勢！」
2. 咖喱薯仔批
隨便Google一下「消失了的麥當勞食品」，咖喱薯仔批一定榜上有名。作為少數咸味批，咖喱薯仔批獲不少網友正評，明言「i miss 咖哩薯仔批 very very much」。唔知麥當勞幾時先肯畀咖喱薯仔批回歸呢？
3. 粟米批 （2004、2014、2016）
「食栗米批開頭好似飲緊熱辣辣栗米羹，跟住口感係一粒粒爽口既栗米，再外脆內爽加熱同埋香！」單看網友們的形容，已經感受到粟米批的威力。
粟米批早在2004年已經推出，大家等啊等，再等啊等，等足十年，至2014年麥當勞才重新推出。
4. 田園脆批 （約2000年間）
關於田園脆批，其實係一個謎。謎就謎在，有人對它印象超深刻，但亦有人聽都無聽過咩係田園脆批。
筆者印象中無食過，根據網友的形容，批內有芝士、雜菜、粟米，「一咬落去啲芝士就流出嚟」。
在這個喜愛邪惡拉絲的年代，如果麥當勞讓田園脆批復出，可能會大受歡迎呢！
5. 三角形朱古力批 （2009）
為何要強調「三角形」朱古力批？因為麥當勞在2016年亦曾翻推朱古力批，但外貌就由三角形變成長方形，不少網民都覺得，三角形朱古力批比長方形朱古力批更好食。
講返個批，咬下去朱古力爆出，咬一口，好幸福啊！
6. 朱古力脆筒/芒果脆筒 （2006）
講完幾個批，係時候講下雪糕。麥當勞推出過數款雪糕，也令人念念不忘。
當中朱古力／芒果脆筒，令人有食新地筒也有食脆皮雪條的感覺。
望住店員唧完雪糕，浸落朱古力／芒果朱古力漿，然後變成脆皮，小時候覺得很神奇，而且好好食！不過食咗啖脆皮之後，雪糕很易從缺口流出！大家食嗰陣都會好小心咁慢慢咬。
【更多】麥當勞叔叔是小丑？ 開心樂園餐點嚟？ 麥當勞你不知的十件事
7. 彩虹新地筒 （2007）
另一種令人難忘的新地筒，應該是彩虹新地筒。在新地筒的雪糕邊加上不同味道的醬，可選朱古力咖啡、提子、紅莓和朱古力。
由於醬只加在雪糕外，舔完最面層已經變返普通雪糕；但成品七彩繽紛，相當吸引。可惜當時並非「相機食先」年代，否則一定勁多人用佢嚟打卡！
翻查當年廣告，單買一個新地筒需$2，而彩虹新地筒則索價$4.5，不過仍有不少人購買。
8. 聰明豆麥旋風 （2016年前）
現時買麥旋風，除了一些「期間限定」的味道外，一般只有曲奇味道。但其實最初麥旋風是有曲奇、咖啡和聰明豆三種味道，咖啡味最早消失，而聰明豆亦於2016年下架。
不過對於網友來說，聰明豆麥旋風的評價好壞參半，有人覺得好好食，亦有人覺得「吉牙又好甜」，咁你又點睇？
9. 麻辣麥樂雞 （2009）
鍾意食辣嘅你，記唔記得麻辣麥樂雞？
麻辣麥樂雞當年農曆新年與紅豆批一併推出，不如「點jack」，麻辣麥樂雞的麻辣味道，早已混入麥當雞內，唔使點醬都食到麻辣味。
當年除了麻辣麥樂雞外，麥當勞更一併推出麻辣板燒雞腿包、麻辣板燒豬柳包等，鍾意食辣嘅我，真係好掛住佢哋啊！
10. 雞/牛/豬烤餅 （2004）
麥當勞的非漢堡類主食，雞/牛/豬烤餅可算是表表者，2004年，麥當勞推出雞扒、黑椒豬柳和韓式牛肉烤餅，當時以「清新滋選」健康飲食作招徠。
對於這個烤餅，唯一一個印象就是咬下去好多菜、好多菜同好多菜。嗯……健康飲食嘛！
11. 咖喱漢堡 （2013）
提起咖喱漢堡，點可以唔提「咖喱漢堡攝影比賽」？一眾高登巴打當年買到咖喱漢堡後，一打開包裝紙，已受到非一般視覺衝擊，「喂打開好似屎包咁！」
比賽列明「嚴禁用真屎參賽」，大家玩得不亦樂乎，人人upload疑幻疑真的咖喱漢堡相，隔住個mon都feel到臭臭哋喂呀，upload完笑完，自己咪又係要食返！
12. 想佢永遠存在的將軍漢堡
甜甜哋的醬汁加上漢堡扒，香港人，對將軍漢堡總有份熱愛。麥當勞每年返推一次，每年也會播出電視廣告，大叫「將軍、玉子返嚟喇！」大家睇到廣告，又知道係買包嘅時候。
將軍漢堡年年熱賣，其實早在1992年已經出現，當時只售$6一個。但麥當勞卻怎也不將它加入常規餐點中，或者，咁樣先可以每年叫一次，「將軍同玉子返嚟喇！」
其他集體回憶文章：
十個90後上網集體回憶 HKflash畫畫 狂玩線上小遊戲7間食店90後一定食過-熱帶雨林餐廳、東東雲吞麵你記得嗎？【真香港人】荃灣人必有共鳴十件事-踏上那震震下的天橋【真香港人】自認地道屯門人？ 10件事測試你係咪真【真香港人】自認地道觀塘人？ 一定答得出邊間是「新舊老麥」【真香港人】7件事知你係黃大仙人 一定去過摩士煲蠟、獅子山BBQ【真香港人】只有將軍澳人才懂7件事 商場圍城 康城輪迴【真香港人】元朗人才懂9件事 永年合益與餅叔