【睇片】TVB 50週年台慶4大尷尬位 網民：唔敢睇
無綫（TVB）尷尬位處處之餘仲被網民瘋狂恥笑，我們為大家盤點今年台慶四大老尷位，最後仲有彩蛋！
大台成日蝦碌就係人都知，估唔到台慶都咁精彩，尷尬位處處之餘仲被網民瘋狂恥笑，雖然有農夫扮Do姐救場，不過都難掩陣陣膠味，一齊來睇睇今年台慶的「精彩」場面。
第一幕：廣場舞跳唔齊（好鬼尷尬級）
台慶先是由一班男藝員打頭陣，想效法百老匯歌劇熱鬧場面，但網民就話好似「廣場舞」，男藝員跳得唔多齊，幾乎無一刻大家係做緊同一個動作，當中馬國明更頻頻甩Beat，馬明指自己跳舞一向差，已經提早回港練習，有網民仲表示，「叫50個型男騷肌好過啦,跳乜鬼舞」「馬明呆到自己都笑左」「弱智仔咁」。
第二幕：陳展鵬360度凌空「咪鼓」（世界級尷尬）
台慶其中一個表演節目，陳展鵬坐在安全裝置上，360度旋轉打鼓，歌手假唱咪嘴不算罕見，但去到台慶咁大件事，竟然都扮打鼓，而且跟不上節奏，現場演繹何謂聲畫不符，認真尷尬。網民亦都唔收貨，「屌你連drum solo都要咪鼓」「點解套鼓要飛起」「邊個弱智諗出黎」
第三幕：馬明阿Bob世紀激吻（尷尬癌）
係呀又係馬國明，今次係演短劇途中，馬國明同阿Bob，分別扮《上海灘》的丁力及馮程程，本來劇情係兩人面貼面借位扮kiss完場，不過司儀之一的林曉峰亂入，出手將兩人強行咀嘴，引起全場驚呼，鏡頭亦影住馬明女友心穎BB，露出耍手拎頭的表情。馬國明事後表示：「估唔到阿Bob個嘴唇咁軟熟！」網民對此亦非常大反應，「心穎：你洗口洗一星期」「馬國明好慘」「馬明好慘 tbb御用on9」
第四幕：劉江DEM BEAT冇人理（骨灰級尷尬）
劉江起台慶中扮演「潮語博士」，一邊同人打架，一邊帶人DEM BEAT，「I say TV, you say B」但同佢對手的黃祖藍、歐瑞偉等，一係跟唔上，一係唔知幾要「B」，台下觀眾都睇到一頭霧水，疏疏落落咁拍下手就算。網民對於劉江一把年紀，仲要上台扮鬼扮馬，替佢感到不值。「劉江好慘，好撚on9 完全笑唔出」「................自己講自己笑，好尷」「頂, 好慘,唔忍心睇落去」
第五幕：陸永扮Do姐拯救全場
4個尷尬位數完，講下全晚的亮點，係陸永著女裝扮Do姐講嘢，呢part大家真心讚好笑，因為動作語氣都似模似樣，Do姐睇到都忍唔住大笑。而C君就以高八度聲線，扮「獎門人」曾志偉，不停講金句「打和」，引來曾志偉不斷追打，全場觀眾終於識笑，網民亦紛紛給予農夫正評：「d語氣好撚似」「都係靠農夫食糊」「終於堅笑得落」
雖然笑點人人不同，不過睇來大台對於觀眾的口味，仍然有少少脫節，令尷尬場面一再出現，如果你自問夠大心臟，不妨轆上去再睇一次。
相關文章：