【世上最乞人憎星座】「一定係處女座」 完美主義兼挑剔
根據星座學說，世界上的人被分為12類。12類人各有自己的性格特質，有些較霸道，有些則陰晴不定，有些更是雙面人，而且各自有較合拍的類型。《開罐》走訪街頭，嘗試找出當中的定律，結果發現不論你是屬於哪一個星座，都會認為處女座最討厭！
「你最討厭嘅星座係咩？」「處女」「處女座」「應該係處女呀」記者街頭訪問逾20人，竟然大部分都不經思索就指出處女座。究竟生於8月23日至9月22日的這群人有多討厭？
聽過一班受害者的剖白，我們得出處女座有以下的乞人憎特徵：
【點擊全螢幕觀看影片】
一是指他們都是完美主義、腌尖，「一定要做A，做到100分，即係99分都唔得囉。好似襯衫，我調轉左隻襪，叫我調返轉佢，但冇人見到㗎嘛，都要調返轉佢囉。」
二是指他們有超乎常人的思維，「有啲好微妙嘅原則，執著一啲好奇怪嘅嘢。可能買咗啲好貴既衫呀袋呀，但又慳埋啲柔順劑呀一、兩蚊嘅嘢囉，唔明佢諗咩。」
三是指他們易發脾氣，「講錯句嘢即刻西晒面。話你好似著呢隻色衫唔係咁好睇，即刻西面，然後好快返屋企。」
結論就是，這類人真的好麻煩。「我希望有生之年好快遇到一個好好嘅處女座。」近乎絕望的人說。
處女座自己又怎樣看別人的批評呢？「啲人話處女座嘅人好挑剔。」記者說。「我都挑剔嘅咁。」處女座男答。「好固執。」記者又說。「我都好固執嘅咁。」處女座男帶點無奈說。他不認為自已小事化大，又指自己只是做事有原則。「我唔覺得啲人憎我，我覺得身邊嘅人好鍾意我。」或許這句才是處女座人際關係不太好的主因。
除了處女座之外，比較討人厭的就是天蠍座。
在他人眼中，天蠍座就是毒舌、小器、記仇，報復的心態更是叫人恐懼。「好狠毒，分咗手之後會諗好多方法去報仇。佢（朋友的前度）男朋友有養倉鼠，佢分咗手話咩佢愛嘅嘢全部都整死晒佢咁囉。」
不過其他星座亦有令人討厭的地方，例如金牛，他們美其名慳家，實質孤寒。「一分一毫佢都計到足，人哋去餐廳畀貼士可能一兩蚊冇所謂，但佢一毫子都計。」經常與他人計較，就會令人覺得難以溝通。
天秤多靚仔靚女本非乞人憎的理由，但恃著自己漂亮橫行霸道卻是死因。「成日同老細講『唔好意思我唔舒服呀』，扮晒蟹呢，跟住就收工。」水瓶座女雖然覺得事不關己，但認為天秤行為過份。
云云受訪者中，覺得最討人厭的就是處女座，但討人喜歡的原來都有偏愛類別，那就是巨蟹座。
「巨蟹座嘅男仔係最好。大家搵男朋友搵巨蟹座啦。」「巨蟹係好人到，俾人恰緊都唔覺自己俾人恰。」有人更說身邊有巨蟹座朋友每年在情人節均會手造朱古力送給朋友，有年情人節剛巧在星期日，結果該朋友親自上門派朱古力，大讚他是暖男。
討論氣氛那麼熱烈，大家又是否迷信？其實大家都是說，「準嘅咪信囉，唔準嘅咪唔信囉。」畢竟每人性格都有點不同，不能說所有優缺點都跟星座有關。
處女座男就說，「其實星座呢啲野唔可信嘅，應該睇咩呀……睇樣囉吓嘛。」