不少人認為，男校生六、七年都是對住男仔，一見到女仔就會變成狗公？還是上到大學或出到社會，都不懂得溝女的毒L？甚至有人會因寂寞難耐而「中途轉基」？由男校生親自解答，只有讀過男校才了解的秘密。

膠Wing和松鼠由中一第一日就認識，到現在大學畢業都保持聯絡，他們都認為，男校生並非坊間所想咁悶。

1.男校多薯仔？

松鼠笑言，讀男校少不免會被標籤為薯仔，不過其實不是所有人都只係識讀書，亦有好動和外向的男生，自己就是因為參加野外定向比賽，而認識其他學校的女生，再成功出pool。而膠Wing就指出，自己中學時期是毒男一名，亦沒有識女仔的意欲，「男校有讀書人、毒L、打機友、溝女怪、天文台、八婆、運動健將」，他認為男校的圈子已經很「豐富」。

2.男校點溝女？

雖然中學時期冇拍拖，不過膠Wing旁觀者清，指男校要識女仔其實都有好多方法，JOINT SCHOOL及校外活動，甚至去補習班都可以識到隔離學校的女仔。他坦言男校無疑是欠缺同女生相處的經驗，自己也是上到大學才開始拍拖，「經驗少真係會衝動啲，都唔係次次成功。」，唯有從錯誤中汲取經驗。

而松鼠在野外定向認識女生之後，就開始在網上交流，加上有共同興趣，很快便走在一起，不過松鼠指自己不會強求拍拖，因每天同同學一起過，「每一日都好盡興。」

不過二人都承認，會對學校的miss或鄰校女生行注目禮，他見過一位新來的年輕女老師轉堂時，後面跟著一班男同學，笑說「同學可能鬱咗太耐。」

【睇片】女校生才懂的6件事 畢業生：潛移默化覺得不比男生弱

3.男校可以玩到幾癲？

男校少不免會有「Happy Corner」，而松鼠的學校就更上一層樓，加強版的Happy Corner名為「起壇」，在corn人之前，先將「受害者」的皮帶、鞋襪等除去再亂掉，再進行「Happy Corner」，松鼠由於比較玩得，多次成為「起壇」的目標。

「生日一定走唔甩，有時興起都會corn吓我，被corn的一定是玩得的同學，因為不會有hard feeling，更不會向老師投訴。」

而同學被corn之前，都會將身上的銀包、電話、眼鏡、手錶等財物，交由其他同學保管。「對我們來說，『起壇』是一個儀式，目的不是要傷害他人，更不是欺凌，因為大家都享受其中。」

4.男校多hehe？

膠Wing同松鼠都表示，這是很多人的迷思，根據他們六年的觀察，男校是有真正的hehe，但同學都很少會大驚小怪，最多只當是茶餘飯後的話題，就如男女拍拖，兩個男生之間的感情，都是個人的事，同學都不會因而欺凌他們，「佢哋又冇阻住我哋，我哋咪唔阻住佢囉。」

【睇片】有一種孤獨叫創業 90後甜品師哭訴：羨慕別人有同事分享扶持

5.男校兄弟情

對於讀男校的最大得著，膠Wing和松鼠都認為，是可以識到一班好兄弟，如果讓他們再選一次要不要讀男校，他們都表示，寧願不出pool都要再讀男校。膠Wing說，讀男校可能會缺少著住校服拍拖的青春感覺，但換來是同學之間更強的凝聚力。

你讀完書出來，你唔會記得本書讀過甚麼，但你會記得曾經識過咁嘅朋友。