【樹仁心聲】願意留在寶馬山食飯的學生 個個都是勇者!

撰文:過期大學生
出版:更新:

樹仁大學貴為大學,不過一直都冇一間似樣的飯堂,雖然附近有幾間食肆,不過大部份同學寧願搭車落銅鑼灣、北角、炮台山,都唔願意留喺寶馬山,到底呢幾間食肆點解令人聞風喪膽,而願意留喺寶馬山食飯的同學,又點解偏向虎山行呢?

大學生活除咗上堂、上莊,
醫肚都係一大課題,
唔同大學都有自己的招牌菜,
好食又好,唔好食都好,
都叫自己特色,
不過對於樹仁的同學仔來講,
呢一切都只係笑話,
因為我哋係名副其實冇啖好食。
至於點解我會話樹仁的同學,
係一位位的勇者,
你睇落去就知。

大大座寶馬山,只得三兩間食肆。(紅圈)

【前菜:新雲景肚屙燒味飯】

喺寶馬山生活的樹仁同學,
一定聽過附近兩間餐廳的大名,
一間叫新雲景,一間叫雋園,
兩間並列樹仁學生的搵食禁地,
同學仔對新雲景睇法非常兩極,
唔存在所謂的中間派,
愛的人就會日日食,
不愛的人打死都唔食,
價錢上新雲景比較抵食,
食物質素好唔好就見仁見智,
不時會收到同學的肚屙報告,
凍飲係高危選項,
不過因為全天候有燒味飯食,
加上選擇多,
吸引不少同學以身犯險。

新雲景的燒味飯。(網上圖片)

相關文章:大學難識真心朋友 由期待變失望 最後接受現實的心路歷程

【主菜:雋園異次元菜式】

為人不識雋園菜,
縱稱英雄也枉然。
雋園以「新奇」菜式著名,
每日有為數不少的同學以身試法。
不過好多都係為勢所逼,
如果只有個幾鐘空堂,
落得山來都已經要上山,
有冒險精神的同學,
就會捨新雲景而取雋園。

雋園的外觀與一般餐廳無異。(網上圖片)

樹仁一直流傳一個傳說,
雋園曾出現過巔峰之作「麥樂雞肉醬飯」,
歐美X中港的超級組合,
小編可以話你知係真有其事,
當年食過麥樂雞肉醬飯的人,
已經冇再踏入過寶馬山,
更唔好話雋園。
回想當日他更說「果陣差啲死」。

小編看到雋園時的表情。(《復仇勇者》劇照)

當年小編年少無知踏入雋園,
亦親眼見證一道唔存在於Menu的菜式,
仲食左幾啖,
先畀大家睇睇相,估下佢係乜。

估下呢碟係乜?(網上圖片)

相關文章:大學最容易分手的3個時期 Ocamp後最危險

開估,
呢道菜式名叫「酥炸牛腩」,
我望住佢金黃色的外衣,
同入面黑中帶紅的肉,
咬落去就好似咬中一塊石頭,
淡而無味。
直覺話我知,
呢一個碟唔存在起MENU的神秘菜式,
唔係想像中咁簡單,
有同學估可能係午餐,
牛腩飯的賣剩料,
真相係點就冇人知了。

【宵夜:冇人送外賣】

入黑之後的慧翠道,人影都唔多個。(網上圖片)

有時做要留校做嘢,
8、9點左右想叫外賣,
唔好意思,
你只可以食炸雞或者pizza,
位於寶馬山之巔的樹仁,
雖然稱唔上人跡罕至,
但出入樹仁只得一條慧翠道,
實在甚為隔涉,
一個如非必要,
連的士都唔會上的地方,
又點會有外賣呢,
喺學校想食宵夜?諗吓好喇。

【樹仁學生=勇者】

喺寶馬山食飯,同玩《人在野》冇咩分別。(《人在野》)

相關文章:5件住宿舍前 宿生會沒有告訴你的事!

有人話,
肯陪你捱M記的女仔就娶得過,
咁一個願意留喺寶馬山食飯的樹仁同學,
佢直頭係一個勇者,
大學畢業下山之後,
面對未來的種種難關,
都可以一笑置之。
「我喺寶馬山食咗四年飯」
呢個會係一個跟足你一世的成就。