又係考試嘅季節，各位溫書溫成點？正所謂上得山多終遇虎，每個學生都應該經歷一打開試卷，點知連題目都唔明嘅慘況。有網民就話試過答題嗰時係咁吹水，結果一呼百應，個個都講哂啲又慘又搞笑嘅經歷出嚟，你哋又有冇試過？
【1. 進入吹水mode】連題目都睇唔明，最多人會做嘅嘢就係…點都潦啲字，話唔定老師會畀返一兩分同情分。有網民話吹水吹到自己都覺得尷尬，一路做一路笑～（《出貓特攻隊》劇照） 【2. 上堂學嘅嘢同試卷完全唔一樣】呢個情況喺大學好普遍，見到份卷真係會X出聲！有讀文科嘅網民話reg過一個天文嘅common course，上堂都係教下冷知識，結果去到考試第一條essay就要解釋點用transit of Venus去計太陽同地球之間嘅距離。唔知professor係咪掉轉咗major physics嗰份卷？（《學校1988》劇照） 【3. 考物理填文學】有網民試過中學考物理嗰時，發覺完全唔識做，又唔想交白卷，就背咗幾段《醉翁亭記》落去，以為會考起老師？少年真係太年輕了，個老師仲要改埋佢啲錯字。（《那些年，我們一起追過的女孩》劇照） 【4. 貼錯題】當你唔夠時間溫書，惟有貼下今年老師會出邊幾題，集中火力溫嗰幾課～一貼錯題就gg喇，基本上你想吹都冇得吹！有網民試過因為貼錯課題，三條essay淨係做到一條……小編表示I know that feel！（《出貓特攻隊》劇照） 【5. 讀Account先明】讀會計嘅網民有次冇溫到bank reconcilation，只好亂咁砌數試下ba (balance) 唔ba到，神奇嘅係亂做都做到兩邊一樣。（《七月與安生》劇照） 【6. 全份卷淨係寫”X”】咁夠薑嘅事發生係網民小學英文考試，因為冇條識就淨係填”X”，同屋企人講仲以為佢講笑，派完卷返嚟緊係畀人鬧到X街。（《舉重妖精金福珠》劇照） 【7. 打和 Super！】頭先講到好多人遇到唔識嘅題目，第一時間係老作住先。有網民就話佢個朋友寫滿哂答題紙但離題，而佢就直接留空，結果兩個都係0分！打和！（《出貓特攻隊》劇照） 【8. 連名都寫唔到】題目睇唔明都算，考西班牙文嘅網民試過連邊個位填名、填編號都唔知，由一開考就注定肥佬！（《出貓特攻隊》劇照） 【9. 第一題MC認professor樣】道高一丈，魔高一尺，走哂堂嘅同學就算溫好書都冇用。唔知professor會唔會因為答唔到第一題，之後畀分就手緊啲？（網上圖片） 【10. 發現同學乜都識】做卷唔識都未係最驚，最驚係考完，身邊啲同學講起邊題點點點，發現自己完全聽唔明！唔通我做緊第二份卷？（《出貓特攻隊》劇照）