爆石乃人生大事，如果有一個好嘅廁所，如廁質素都會大大提升！以下5間大專院校都有其出名「乾淨」、「豪華」嘅廁所，網民同同學心目中嘅爆石之選有邊幾個？睇下有冇你去開個嗰喇！
【1.浸大 WLB 2/F】 猶如高級商場般嘅裝潢，燈光明亮，通風良好。喺一個咁靚嘅環境痾屎一定心情愉快，暢通無阻。而且夠多廁格，除咗唔使等之外，最緊要係冇咁容易知道邊個爆緊石，痾幾臭都唔尷尬。（網上圖片） 【2.浸大 AAB 2/F】 AAB係全校入面最新嘅Building，廁所雖然唔夠WLB咁靚但都非常新淨。加上人流唔算多，不失為一個爆石好地方。不過呢度嘅廁所格隔就麻麻地，好容易聽到隔離廁格嘅「入水聲」，怕尷尬嘅同學未必咁鍾意呢度喇。（網上圖片） 【3.樹仁 研究院大樓全部廁所】 呢個大樓舊年先開，而且冇乜人去上堂，廁所又新又乾爽。厚實嘅廁板雪白、無污漬，比舊教學大樓薄依依嘅廁板高級好多，坐落去爆石都特別安心。最緊要每格都有廁紙，唔使喺門口拎定先。（網上圖片） 【4.珠海（新校） M層】 M層冇任何課室，只有返宿舍嘅學生經過，人流少注定佢成為新校嘅廁所王者。乾淨、清靜、廁紙供應充足，珠海人爆石嘅不二之選。（網上圖片） 【5.珠海（舊校） 圖書館入面嘅座廁】 點解要特別指名係座廁呢？因為珠海全校除咗圖書館入面嘅女廁有座廁，其他都係踎廁。雖則踎廁係比較符合人體力學，但係同自己啲排泄物距離咁近，隨時臭親自己。而且踎廁係特別濕滑、污糟，所以痾屎一定要去圖書館！（網上圖片） 【6.中大 NA 圖書館G/F】 圖書館位置比較遠，人流少，廁所污糟極有限！重點係各個廁格都有獨立通風，非常有效率咁抽走臭氣，痾屎時包保唔會畀屎味影響心情，同時下一手又唔會聞到你啲臭屎味。（網上圖片） 【7.中大TCW 所有廁所】 廁所乾淨企理、寬敞，中大同學特別推介3/F、4/F嘅廁所，因為人影都冇隻，隨時痾到暈咗都冇人救到你。最適合鍾意一路痾，一路思考人生嘅同學！（網上圖片） 【8. Poly JCA】 香港大專界嘅殿堂級廁所！JCA裝修後廁所更上一層樓，華麗程度堪比五星級酒店。一路聽住古典音樂一路爆石，簡直係人生一大樂事。不過有時保安會唔畀學生入，喺JCA痾屎嘅機會可遇不可求。（網上圖片） 【9. Poly R core】 識去一定去10樓廁所，人流少、乾淨呢啲基本喇，痾完出黎仲可以遠眺紅磡景色。除咗高樓層之外，低樓層嘅廁所都唔輸蝕，廁格寬敞乾淨，如果你太急等唔到𨋢嘅話都不失為一個好選擇。（網上圖片）