查無此人｜黎紀君演病人角色胃口變細　新人余凱祺曾是50kg肥妹仔

高智犯罪新片《查無此人》，由25歲香港新演員余凱祺（Kaylee）飾演的瑜伽老師擔起故事主軸，片中她與瑜伽班學生黎紀君（Christy）發展BFF關係，但一次重大意外令Kaylee人生逆轉，獨自蝸居劏房反而陷入致命騙局。

Kaylee和Christy這對「密友」有多場對手戲，其中一場是兩人於瑜伽班初邂逅展開FF雙殺，拍攝當日兩位女演員穿着瑜伽裝，由於衣服比較緊身，為保持最佳體態，身型已很slim的Christy在中午放飯時揀了個豬扒飯盒，笑言只能食少少；身型略帶肌肉的Kaylee就選擇雞飯，但她苦笑「好慘」，因為她只能食雞唔食飯，雞亦要過水後才可以進食。

當日兩位女演員都有交流keep fit心得，Kaylee稱讚Christy好fit，又瘦又slim，令她很羨慕；Christy稱拍戲時見Kaylee做瑜伽就知道對方有練開，因為對方動作正宗，反而自己會企唔穩，Christy說：「我知Kaylee好努力（keep fit），要做多啲帶氧運動，我自己食細咗個胃，曾經因為拍一套劇要做病人，所以練細咗個胃覺得好work。」Kaylee聞後即笑說：「我係咪應該接一個有病嘅角色？可以快啲瘦！我嘅問題就係超大食，就算好勤力做運動，都成日掛住食好多嘢…」Christy覺得Kaylee已經好fit，建議對方可以放鬆點，少食多餐。

減肥係女人終身課題

其實Kaylee入行前曾經係個體重超過50kg的小肥妹，當時是2016年她中六畢業後，在餐廳做part time，一向食得但身型偏瘦的Kaylee從沒想過自己會變肥，自任職餐廳後她晚晚和同事消夜，有時又跟朋友聚會吃飯，由早到晚都不停食，結果在短短個多月內，由本來的44kg暴肥到超過50kg，體重直線上升，她亦意識到必需減肥。

Kaylee說：「後來正常飲食，有段時間仲刻意減肥，每日1400卡路里，不停做運動，每朝同每晚都跑步，burn卡路里又唔敢食得多，只係食蛋白質先瘦返，但一完咗又反彈，心理狀態唔太開心，有少少暴食，到而家都係調理緊自己心態，所以真係明白點解減肥係終身課題，而家學pole dance就慢慢再firm啲。」