導演葉念琛一年一度愛情喜劇《愛情奴隸獸》又嚟，雖然阿寶一角換上蘇麗珊，不過林嘉華依然係方力申。睇戲名就知方力申係一名典型愛情奴隸獸，完全臣服於港女之下，而他其中一個女友高海寧（高Ling），就係典型惡女，不單對男友有大量無理苛求，其中一幕更效法4年前「14巴港女」，在銅鑼灣鬧市勁摑男友，足足19巴，多賺5巴添。

導演葉念琛稱這是一齣專為方力申度身訂造的電影，但小方本人就覺得導演今次全心靠害，因為關於奴隸獸的情節都非常過火，就以這幕19巴，不單要他跪在銅鑼灣百德新街，而且要眾目睽睽下被掌摑。雖則話拍戲，但被掌摑時都感到「勁尷尬」。小方說︰「我拍完立即跳上車，事後仲發現臉上有幾道輕微指甲痕。」雖然被演員投訴「過火」，但葉念琛就聲稱現實中真係有這種愛情奴隸獸，自己身邊就有幾個這種朋友。

被摑的慘，摑人的原來都不好受。高海寧接受《香港01》訪問時，就指整個過程其實都好大壓力。「我是負責摑人那個，但其實壓力更加大，因為要在銅鑼灣鬧市拍，冇得試戲，只有在事前夾好大約會怎樣做。到正式Roll機時，導演要求像真，要我做到好似好大力咁摑落去，由於打太多巴，真的好驚會有一次誤中真打，所以我是緊張多過爽！」事實上，最後高Ling都真係有一下不小心，指甲刮損了小方個鼻，搞到甩皮！「我真係超唔好意思！」

問到高Ling現實中會否這樣對男友，她急急回應︰「未呀！現實生活中我未試過摑人呀，哈哈！所以對戲的時候會忍不住笑，但我知道這場戲無機會NG，所以到拍攝前要催眠自己，不停同自己講：『我係一個野蠻女友！我係一個野蠻女友！』才可以順利拍完呢場戲！」睇效果，又的確做得幾似，高Ling這種催眠法有效！

經典回帶14巴港女事件