【殺破狼．貪狼】林家棟畀導演呃全程講泰文︰用粗口做拼音最易記

如果導演同你講，新戲角色你要演一個泰國華僑，想你講下泰文，你接唔接？
聽落問題不大，最多死背！殊不知當你入局後，要講的泰文對白原來是全部，至於廣東話對白就只餘下4句。
「可能佢見我上次在《葉問》講日文對白幾好啦，今次再考我。」林家棟說。
攝影 ：梁碧玲
化妝 ：Esther Huang@J.A.C.K. Timeless
髮型 ：Jeff Li
服裝 ：CLUB MONACO
場地 ：HMV CAFE

呢個語言實驗，最緊要係記性

林家棟在戲中飾演泰國市長的幕僚，作為一個死忠，由於市長心臟有事，對競選連任有極大暗湧，護主心切下決定要幫市長買黑市器官。「要宏觀去看這條事，他有業績，我有能力讓他康復是對個市好的，成件事出發點好，但手段有問題。」所以據家棟解說，今次雖然奸到貼地，但又奸得幾有道理。

 《殺破狼‧貪狼》作為一部動作片，連古天樂都要打時，林家棟就可以置身事外，全程企棟棟去演這位幕僚。「我知道他們打得好痛苦，但我相信自己都不易捱，我要全程講泰文都不是好過。」是真的，家棟個角色是個地道的泰國華僑，所以每句話發音都要標準，就算有偏差都不能太離譜。「大家都要靠死記，我一NG都好大鑊，因為我都盡量不想配音，每晚拍完，返到酒店都要繼續死背對白，仲要默拼音。」幸好無論現場同事，還是做後期的，都覺得他的泰文似樣，總算冇白費心機。

有個不成文的學習秘技，學外語最快捷的方法是從粗口入手，不過家棟發現今次不是泰文粗口特別易學，而是用廣東粗口去記泰文特別易記。「有些讀音我都好驚訝，點解咁似粗口，好似叫人搵醫生，當中幾粒字都差不多已經講晒所有廣東粗口用字一樣，幸好拍攝時全部都是泰國人，否則一定笑到反艇大家會頂唔順。」最抵死地，這種記憶方法，令家棟的發音非常準確，這可能是香港人學泰文的優勢。不過由於泰文有分男與女的用語分別，而教家棟泰文的是位女教師，所以變相他所背的一套是女性語法。「結果去到片場，泰國劇組人員說不是這樣講，於是我又要費神去重頭背過，逐句死記。」看過電影，的確感受到家棟的努力，因為他的確講到「泰流利」，至少呃到香港觀眾。