專訪│柯煒林無心插柳入行 無悔退學變演員:讀書唔係只為Degree

撰文:
最後更新日期:

生而為人,最緊要知道自己想要甚麼。「我覺得,入大學唔係想要個Degree,最重要係,我想學我想學到嘅嘢。」

這是柯煒林(Will)讀了六年大學之後得到的結論。

最終他決定退學,踏進大人世界,成為全職演員。時為2018年。「同父母講唔再讀,佢哋好欣然咁接受呢件事,我覺得有啲匪夷所思!」

兩年後,柯煒林在ViuTV劇集《二月廿九》裏,飾演謝心雪(李敏飾)的另一半Jonathan,最難忘一幕,他在街上突然收到張麗紗(吳海昕飾)的長途電話,泣不成聲的哀求對方回到過去後,務必跟太太說下這番話 ── 不要為腹中塊肉犧牲自己。他說:「如果你真係可以穿越時空,我求下你話畀Fiona聽,唔好揼低我哋,我好掛住佢!」戲份不多,但角色設定再加上演繹方法,令很多觀眾對這位帥氣新晉留下深刻印象,加上後來他在Dear Jane的《銀河修理員》MV擔正,人氣一度再上,甚至有行內人私下跟我說:他值得擁有更多機會。

誰也不能保證,早一點入行有着數。時針分針不斷轉動,回望那六年,柯煒林不覺得走了冤枉路。

「如果唔係因為入到SCM,我唔會突然間做咗演員。」

人生漫漫,從來都是於沿路風光裏,尋找最真實的自己。

撰文:游大東

攝影:梁碧玲

很多人會覺得柯煒林很靚仔,這當然是事實,而且表情豐富,不過似乎無法點出其五官與輪廓的多變優點:帶有鄰家男孩的陽光感覺但略見邪氣,外表傲慢,其實骨子裏溫婉深情 ── 在當今本地影視圈中甚為少見。(梁碧玲攝)

說來奇怪,看柯煒林演出已好幾年,亦認真跟他聊過幾遍,但當年他怎樣出道,總是說不出所以然,只知道他曾經入讀香港城市大學的創意媒體學院(School of Creative Media, SCM),記憶容易出錯,好像主修導演?阿Will澄清說:「從來都唔係,其實係Programming,係Science嚟嘅!」

他說,因為想唸電影,所以選讀SCM。「但SCM唔係一間純粹教你點樣拍戲,佢係一間Art School,所以係好唔同。」這個為本地影視界培育無數人才的著名學院,要求本科生入讀的第一年修讀不同類型的基礎學科,再按成績高低,決定第二年他們可以編入哪個主修科。

柯煒林入學沒有多久,已積極投入校園生活,亦悄悄播下當演員的種子。「當時有啲師兄師姐問我有冇興趣Casting,咁咪試下,因為做完Cast之後可以做Crew,我好想喺成個拍片嘅氛圍入面。」2013年,如白紙一張的阿Will,參與何玥執導的鮮浪潮作品《如霧起時》,飾演學生葉進其,試圖挑逗失婚中文老師(詩娜飾),對劇情對角色對情緒全無概念,後來經導演細心講解,試了幾次,終於有感覺,聽到耳邊響起「Good Take!」兩字,如觸電般興奮,身體起雞皮,他好好記住那感覺,提醒自己:幕前似乎是他嚮往的地方。

柯煒林接受專訪期間,戴上帝舵表2020年最新推出的「TUDOR Black Bay Fifty-Eight Navy Blue」海軍藍腕錶亮相人前。(梁碧玲攝)

求學問 不求學位

時間有限,這邊廂出盡力,自然冷落另一邊,結果反映在期末的成績單上。「太掛住出Crew,冇理到GPA,結果因為咁,揀唔到自己想入嘅Major,去咗讀Science(理學士)。」當中跟電腦科學有關的科目,佔去整個課程的一半,包括程式設計以及數據分析等等,對柯煒林而言,是個很大的難關。「我發現,就算我幾用功都好,一掂呢個Topic就唔得,我覺得,入大學唔係只係想要個Degree(學位),我係想去學我想學嘅嘢,我係想去讀一啲同Art有關嘅科目。」

但身為一個理學士本科生,如何選修文學士本科生的主修科目?蹺妙之處,在於用另類方法報讀。阿Will解釋:「學院Compulsory要我讀嘅必修科,我全部Drop晒佢,至於我想讀嘅科,唔Suppose就咁用電腦Register,我就再不斷用Paper Add科,全部寫信畀Professor,佢哋唔會知有個人不斷喺唔同Art嘅科目嗰度游走。」修讀過Cinematic Art(電影藝術)、接觸過Sound Art(聲音藝術)、涉獵過Installation Art(裝置藝術),總之有得讀,小伙子就開心滿足。

柯煒林在年初首播的ViuTV劇集《二月廿九》,飾演謝心雪(李敏飾)的男友和丈夫Jonathan,戲份不多,卻令觀眾留下深刻印象。(《二月廿九》劇照)

放棄學位 驚訝父母欣然接受

突然有一天,收到學校通知,令柯煒林漸漸有退學念頭。「學校同我講,如果再Paper Add/Drop就會爆Maximum Credit(學分上限),當時唔可以讀趙崇基導演教嘅Script Writing(劇本寫作),但要讀番啲Core,咁咪讀囉,但用心讀都讀唔到,嗰陣時開始有諗不如Quit咗佢,因為當時已經Defer(延後)咗,都講緊係Year 3定Year 4,總之《點五步》上映嘅時候,我仲讀緊書嘅。」

直至2018年,他終於決定告別校園,踏上全職演員生涯,關鍵在於那年,他獲邀參加「星。勢。力」,在項目及形象總監劉天蘭帶領下,他與林耀聲、吳海昕、余香凝、談善言、梁雍婷、李任燊、顧定軒、馮海銳、鄺芷凡一同受訪、拍攝造型硬照,更可以一同踏上金像獎的紅地氈。

「我一直都有滲啲滲啲咁講畀屋企人聽:我隨時可以唔讀㗎,好記得,當我拎咗本『星。勢。力』本特刊返屋企,唔係專登擺喺度,一個禮拜之後我就同佢哋講我唔讀,佢哋好欣然接受呢件事,我覺得有啲匪夷所思,懷疑會唔會同嗰本嘢有關,好似Some how都叫做有啲嘢畀人睇到。」後來阿Will亦有換個角度想,其實爸媽從來不會阻住自己做任何事,無論先開口還是先見到那本特刊,答案都是一樣。

才24歲的柯煒林,一臉清澀,試鏡後獲得《點五步》演出機會,逐漸踏上銀色旅途。(柯煒林facebook專頁)

沒有SCM的經歷 沒有今天的柯煒林

兜兜轉轉,前後六年的大學生活,最終沒有收到畢業證書,現在回想,會不會索性提早入行更好?阿Will認為,那段日子沒有白過,沒有SCM的經歷,沒有今天。

「我絕對讀到我想讀嘅科,又拍咗條《鮮浪潮》嘅短片(《從缺》),又識到班Friend,言談間會Share好多感興趣嘅話題,如果唔係SCM,就唔會有呢啲經驗,亦唔會因為師兄師姐叫我去拍佢哋嘅畢業作品,而突然間變做演員,之後都係有份參與《點五步》製作嘅人叫我去Casting,我先有得演。」他笑言,現在偶爾也會回想,當時在學校裏是否有可能努力一點。「我就係好任性,跳咗落去我想做嘅嘢之後,就會唔理其他嘢。」

世事從來無如果,假如當年阿Will完成了學位課程,今天香港的影視界會不會見到他的蹤影?又會不會有這篇專訪出現?

(柯煒林專訪二之一)

2018年柯煒林獲邀參加「星。勢。力」,在項目及形象總監劉天蘭帶領下,他與林耀聲、吳海昕、余香凝、談善言、梁雍婷、李任燊、顧定軒、馮海銳、鄺芷凡一同受訪、拍攝造型硬照,更可以一同踏上金像獎的紅地氈。(柯煒林facebook專頁)

點擊下列圖輯,欣賞柯煒林專訪靚相:

+11
+11
+11


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。