【男兒當入樽】港產片26年前已拍過真人版 鄭伊健變港版流川楓

撰文:
最後更新日期:

日本經典籃球漫畫《男兒當入樽》作者井上雄彥今日(7日)宣布開拍動畫版電影,令一眾粉絲為之瘋狂,有望在大銀幕上看到湘北對山王經典一役,真係未出發先興奮。

其實早於26年前香港已拍過真人版《男兒當入樽》,鄭伊健飾演「波神」高秋,人設似足流川楓,不過一頭長髮就出晒戲,反觀鄭則士一出場就知佢扮安西教練,還原度達100%!

《男兒當入樽》雖然「爛味」甚濃,但都算幾熱血。(電影截圖)

《男兒當入樽》由袁錦麟執導,吳大維、鄭伊健、古天樂、麥家琪、鄭則仕及郭藹明等人主演,講述鄭則士領軍的「華勝」籃球隊因加薪問題,一眾主將紛紛離隊,鄭女兒麥家琪四出尋覓新隊員,以應付接下來跟美國巨人隊的比賽,卻找來幾位奇奇怪怪人物,當中有人精於跳舞、有人精於打機,球技了得的吳大維因鍾情麥家琪而入隊,還有鄭伊健飾演的「波神」高秋。經過一連串的試煉後,華勝最終戰勝巨人隊。

鄭伊健飾演的「波神」高秋識飛天入樽。(電影截圖)

戲中鄭伊健飾演的「波神」高秋,球技出神入化,識得飛天旋轉入樽,喜愛藏身高處突然現身,然後爆幾句似懂非懂的金句,性格冷酷擺明抄流川楓,但他又十分貪錢,仲會追女仔,相當騎呢。雖然鄭伊健搶晒鏡,但其實男一是吳大維,其人設似十足櫻木花道,性格十分暴躁,同樣為了追女仔而加入籃球隊,戲中要負責搞笑但唔好笑。

吳大維的角色人設擺明抄櫻木花道。(電影截圖)

戲中仲有未曬黑的古天樂,其角色最無厘頭,他本來是跳高選手,加入籃球隊後只顧溝女,幾乎連波都冇掂過,而且頭二十分鐘後就突然退隊消失,令人摸不著頭腦。麥家琪明顯參考赤木晴子,戲中穿低胸裝打籃球,相當符合港產片特色。

更多電影精彩場面

+21
+21
+21

電影製作相當粗製濫造,打波場面以誇張為主,演得最認真的是鄭則士,他飾演球隊教練,除了對球員實行魔鬼訓練,仲一度展現入樽技術,令人嘆為觀止。而現已出家修行的林偉亮於戲中飾演鄭則士兒子,同樣球技了得,長髮造型頗似三井壽浪子回頭前的形象。

呢一幕仲可以唔認係抄咩?(電影截圖)

另值得一提的是,電影尾段大戰最後一球由鄭伊健交波給吳大維入樽絕殺,對照人設為流川楓傳給櫻木花道,剛巧漫畫版的結局中,湘北對戰山王工業時,流川楓傳波給櫻木花道絕殺,電影比漫畫結局更早推出,竟然神預言了結局。

這部老翻作「爛味」甚濃,當年收310多萬票房,成績強差人意,但事隔多年翻睇又覺得趣味十足,相信今時今日再難有片商願意投資開拍同類型作品。



請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。