颱風小犬|8號風球同《飯戲2》巨型請帖打卡 仲有戀愛運測試機玩
颱風小犬襲港,中午已掛上8號風球,所有戶外活動被逼取消,不少市民轉投商場搵節目,而去戲院睇戲就成為首選。電影《飯戲攻心2》日前公開一張請帖,公布續集演員名單,引起一片熱議,而今日有好幾間戲院更擺出一張巨型請帖供大家打卡,仲有戀愛運測試機玩,成為8號風球下另類娛樂。
電影《飯戲攻心》,去年上映叫好叫座,大收7734萬港元票房,成為年度票房第二位。本周五(6/10),片方官方社交平台,公開一張請帖作宣傳,疑似宣布續集《飯戲攻心2》將定於來年賀歲檔上映,仲公開演員名單,由於未見上集的演員名完全無影,只剩下「阿媽」廖子妤,換上的是黎彼得、謝君豪、蔣志光,加埋羅蘭同米雪,成班老戲骨全面進場,卡士引起一片熱議。
雖然真正卡士仍是個謎,但宣傳攻勢亦已展開,今日(8/10)導演陳詠燊便在個人社交平台,上載了幾張在戲院擺設的巨型請帖,寫道︰「好開心!好感動!連我自己都未趕得切出post宣傳,大家喺颱風下都已經排緊隊嚟支持!多謝大家!」
除了有巨型請帖打卡,原來仲有一部戀愛運測試機,畀大家抽張戀愛卡出來看看運勢,而這批卡更經過「一燈大師」陳詠燊開光。「呢批飯團戀愛卡,真係我出手㗎!一燈大師祝大家戀愛運爆燈,喺復活區嘅都立即遇到心上人,冧爆全場!」
《飯戲攻心2》戀愛運測試機地點︰
《飯戲攻心2》戀愛運測試機將設於以下四間百老匯戲院,只要投入HKD $1,即可抽到一張由一燈大師陳詠燊導演親自開光及撰寫嘅飯團戀愛卡,測試下你來年嘅戀愛運程,兼贈你愛情金句指點迷津。幸運嘅朋友如果抽中Sunny導演特別限量戀愛金卡,仲會獲得《飯戲攻心2》電影贈券一張,數量有限,先中先得。
- MY CINEMA YOHO MALL
- 葵芳百老匯戲院
- MOViE MOViE Cityplaza (太古城)
- B+ cinema apm (觀塘)