臨時劫案｜林家棟有同謝賢拜年 力證精神好：仲喺度Boom Cha Cha
撰文：許育民
出版：更新：
賀歲電影《臨時劫案》今日（17/2）進行謝票，導演麥啟光，聯同男主角林家棟、演員姜卓文、符家浚及王頌恩出席。對於電影口碑好好，林家棟都表示非常開心：「初初冇諗賀歲檔上，起初是擔心，因為戲中有血又有開槍，但我話只要套戲好睇觀眾鍾意就得。」
林家棟與導演麥啟光出席《臨時劫案》謝票。（葉志明 攝）
對於有網民戥套戲唔抵，因為太少場次影響票房，家棟就覺得有口碑自然會加場次：「其他兩部都是好好的電影，有好好嘅組合，我哋就三個廢中，以及一班新演員，觀眾可能覺得叫座力會爭啲。不過只要有口碑，戲院都唔會同錢作對。」導演麥啟光就引述監製爾冬陞先生一番話作解說：「佢話每套戲都有自己條命，唔好咁強求，條路由佢行自己發展。」
對於電影有口碑但欠場次，林家棟覺得戲院不會同錢鬥氣，有人睇自會加場。（葉志明 攝）
過年期間，家棟都有向四哥謝賢拜年，對於網傳四哥在年初二時癱瘓送院，家棟表示未聽過，亦力證四哥精神好好。「好精神，嗰日傾開偈佢仲突然喺度Boom Cha Cha，真係跳舞。我話不如等佢90歲大壽，包間好似《殺出個黃昏》嘅歌廳，畀佢Boom飽佢。」至於四哥有否對傳聞感到不快，家棟就指真係不清楚有這傳聞，「我唔覺得佢有問題，精神非常好。」
有傳年初二四哥謝賢癱瘓入院，林家棟力證他非常精神：「傾開偈佢仲突然喺度Boom Cha Cha，真係跳舞。（葉志明 攝）