從今以後|李琳琳想與區嘉雯合作決定出山 「合作完仲愛上佢」
撰文:許育民
出版:更新:
《第四十八香港國際電影節》今日(8/3)舉行記者會,由楊矅愷執導、區嘉雯與李琳琳主演的電影《從今以後》,早前於柏林影展勇奪泰迪熊獎,今日宣布成為電影節開幕電影之一。兩位女主角李琳琳與區嘉雯接受傳媒訪問,都表示是極大鼓舞。
李琳琳覺得電影能成為電影節開幕電影,定必是評審覺得部戲好有誠意,拍得好好。李琳琳已經有30多年未有正式的幕前演出,最多都是客串性質,今次能夠被打動都是因為劇本好:「題材好特別,好多角色喺我呢種年紀可以遇到,但呢個角色可能一生人都唔會遇到,機會好難得。加上我知道有嘉雯演,佢係一個攞獎無數嘅演員,好想同佢合作。」
再次返到幕前,琳琳姐坦言有少少緊張:「擔心自己唔知會唔會Out咗,幸好拍檔嘉雯好好,我有睇《叔·叔》,佢戲份唔多但演得好自然,佢做到就係呢個角色,唔係演出來,合作完我仲愛上佢,會掛住佢。」嘉雯姐亦坦言有掛住對方:「知佢前排有病,成個人瘦晒都好心痛,今日見到佢好番晒就開心。」
今屆香港電影金像獎,丈夫姜大衛有份競逐最佳男配角,問到來年有冇信心到自己候選?李琳琳:「我就唔會,我期待嘉雯拎獎。(John哥在家中可有緊張?)佢又冇,不過佢上一次得獎已經1970年,相隔咁多年再提名金像獎都係一份鼓舞,對佢嘅肯定。」至於隨後會否再參與演出,琳琳姐表示題材是可遇不可求:「要再睇睇劇本先再考慮。」