亞洲電影大獎｜陳靜透視現身自信不走光：今朝食咗一個蘋果

第十七屆亞洲電影大獎頒獎禮今日（10日）舉行，一眾亞洲影人與演員進場前盛裝踏上紅地氈。擔任紅地氈嘉賓的Dada陳靜以超性感透視長裙現身，並於紅地氈上接受傳媒訪問。

Dada分享今日驚喜造型時表示：「為咗條裙做咗三個鐘頭準備！（驚唔驚走光？）呢啲我都好有經驗，用咗唔少時間做安全措施。（駛唔駛修身？）我今朝到而家食咗一個蘋果咋！」笑言完場後將會吃喝一番。

今日難得與一眾嘉賓同場，Dada表示未有想見的男神，表示：「反而想見范冰冰！」至於近日以素顏上陣拍戲，Dada興奮地表示：「我鍾意素顏拍戲啊！最緊要啱自己！同埋唔駛搞咁多嘢，今日個妝搞咗兩個鐘！」