明明是個急速城市 香港人幾時愛上HEA
慌死蝕底，係好多香港人共同嘅性格特點。明明趕到呢班車，結果搭唔到，就係蝕死。由讀書到做野，好驚讀少人地一秒，行慢人地一秒，蝕底就係落後，死罪。咁急嘅人，點解會鍾意 hea 呢…Hea，係一種對現實的對抗。
搭地鐵，大概是最能看到香港人個性的一個場合。
年初回香港，朋友話同我去太平山街嘅 café hea。搭地鐵，喺北角站轉車，對面月台有車到，所有人即刻九秒九衝過去。
唔係一分鐘一班咩？我仲唔知死好整以暇。
朋友話：阿woo你覺唔覺得自己耐冇返黎香港，行路都慢過人。
我唔啱，忘記咗自己來自行路都要快過人嘅城市。但我地唔係趕返工嘛，快一分鐘同慢一分鐘去到飲咖啡的地方，有分別嗎。朋友白了我一眼，一副你唔明啦的表情。
慌死蝕底，係好多香港人共同嘅性格特點。明明趕到呢班車，結果搭唔到，就係蝕死。由讀書到做野，好驚讀少人地一秒，行慢人地一秒，蝕底就係落後，死罪。
咁急嘅人，點解會鍾意 hea 呢。
我理解，hea 不是休閒，是一種自己的 life style，係一種我可以揀我有得揀嘅態度；突出自己嘅唔同，不屑班做餐死嘅傻仔，一副我就係要嘥時間，而且我嘥得起嘅架勢，時間點解要咁 productive 呢，小學生放學之後點解一定要有 8 樣課外活動呢。
Hea，係一種對現實的對抗。
城市裏面大部人奉以為發展綱領和成功定律的勤力和效率，hea 的人就是要反其道而行。
自己唔係一個鍾意 hea 嘅人，離開香港多年，依然把香港人做餐死嘅個性發揚光大。
返湖光山色既美國渡假，10天是極限；清晨 4 點起身陪朋友去釣魚果 5 個鐘頭，真係好想拎個 tablet 出黎；飲咖啡睇雜誌，最多只可以一個禮拜一次，多就唔好玩；都係鍾意喺機場寫稿，同 boarding 前再覆 3 個email那種充實感。簡稱賤骨頭，攞苦嚟辛。
就係因為一個星期六日半都做餐死，兩個鐘頭嘅 hea 先更顯得難能可貴。Hea 先至有一種偷懶嘅快感。
識得香港一個 3 歲半人仔，典型學 8 個興趣班精通英法語，準備考 St Paul co-ed 果種。有日喺佢企屋，大人唔喺度，o靚仔呆坐咗 5 分鐘，跟住喺地墊上好慢咁，碌黎碌去碌咗 40 分鐘。問佢點解唔玩玩具，佢話唔想玩，想抖下。
否則 10 分鐘後港媽返嚟，又會問點解唔睇書，點解唔彈琴，點解唔玩玩具。
唔玩都唔得？想抖下囉。
港媽唔好驚，3 歲仔hea一日唔會死，唔 hea 反而死快啲。放諸大人身上，就係戲都唔想睇，拖都唔想拍，偶爾一個星期六，你都會只係想素顏喺屋企。
抖下，hea下。
香港人不論3 歲 30 歲，唔想成日處於腎上腺素高昂嘅狀態。英語人講 laid back ，國語人講放空，
其實係抖氣嘅一種。
（本文純屬作者意見，不代表香港01立場。）