贏在起跑線？人生唔係一條直線
照舊，故事行先；
1984 年 NBA 選秀，波神 Michael Jordan，都不過係 third pick；
First pick 係非洲天王奧拉祖雲 Olajuwon；
Second pick 嗰個？已被人遺忘。
生命嘅嘢當然似 NBA，好多時頭 3 節都 hea 打嘅，第 4 節先見真章。咁當然，贏在射精前嘅，覺得最好一開頭畀 50 分底分佢。咁當然有優勢。但，仲過癮咩？不如頒個盃畀你算。贏當然重要，好重要，但自己拎返嚟，點都爽過人哋畀個盃你。
實在好鍾意今次 01 博評「如果我返回大學年輕歲月」呢個 Blog Jamming 題目，好似假設咗作者實有讀大學，又假設埋作者應該不再年輕。
不年輕嘅我，當然有讀大學，有幾難？當年已經 8 間大學，但我相信就算得 1 間，我都有大學讀，因為我讀嘅，係當年收生要求最高之一嘅港大精算。
最貴不一定最好食 「誤」讀精算幾乎包尾畢業
點解讀精算？主要係年少無知，誤以為可以搵好多錢，而我又怕血唔可以做醫生，亦怕同人接觸所以唔讀奸商管理之類。或者如我的同學講：「誤算爹大娘大不如港大，是以愈玩愈大；以為天算地算不如精算，所以被算。」對，本科大把才子，個個都 A-Level 三條 A 起碼。
或者如我另一同學講：想像你人在異鄉，中咗獎，可以去間餐廳任點一個菜，但你唔識當地語言，又冇得問人，咁點？唯有揀個最貴嘅菜，斷估都係好東西。是以，我就食呢碟好菜食咗 3 年。
由上面所講，你想像到，我嘅學習生涯唔係太愉快，最後二等乙級榮譽畢業，實在應有此報。又，二等乙級，差不多包尾㗎啦，本系好似過半人一等榮譽。唔好問我實數，因為這些機會不屬於我。
不過，讀書只係「大學五件事」其中 1 件，另外邊 4 件？上莊住 Hall 拍拖做兼職喎。我就叻仔，1 年級已經做齊呢 4 件事，2、3 年級就專心主攻拍拖同兼職，書當然冇乜點讀過。並唔係我恬不知恥以此為榮，但，呢個係事實，呢個係我，我只能誠實咁話你知。
有冇後悔？有一排有。2000 年夏天，我仲好開心咁睇緊歐國盃，但我啲同學朋友（唔一定同系，甚至唔一定同校）年頭已經收晒 offer 有工返。咁，出嚟食飯，佢哋（特別係做大公司嗰啲）講下各種軼聞，去邊度受訓之類嘅同時，我只有講下我呢排去邊幫人補習，睇咗邊場波之類。當然係有點不好受。做乜當初咁唔爭氣呢？人哋去德國受訓睇萊茵河，我就去元朗萊茵河餐廳（已執笠）；人哋去丹麥受訓，我就去丹麥餅店。
然後嘅事，上次篇《hea 的真義》講過，就係去咗英國讀 Master，主要係逃避搵工，結果成為生命中最重要嘅一年。2001 年，返到香港，以上的東西重覆一次，而我同啲同學朋友的距離，愈拉愈遠。留意，我返嚟香港，正係 911 之後冇耐，搵工不易。後來好歹 2002 年搵到份工，就後話。
生命哪有如果 最重要是無悔
寫到呢度，你大約想像到我大學時代係點。堂當然少上，主要活動係識下女仔同埋幫人補習。唔幫人補習邊有錢拍拖？其他時間，同學都知，有事（主要係通知我記得去考試，真感動）可以在圖書館搵到我。咁勤力？係呀，我成日在圖書館的，不過在馮平山。
馮平山唔係一座山，係一個人。馮平山圖書館多中文書，我就日日在嗰度睇啲同本科無關嘅書。哲學啦，歷史啦，文學啦，其他科學啦，就係唔睇本科的書，反正本科書都冇中文。
如果有得重來，會點？呢個問題我當然諗過無數次，特別係唔多開心嗰時。你會好似個落敗嘅球員咁不停諗：如果嗰球我射大力啲，咪已經入咗。如果嗰球我出手拉佢，就唔會失波……如果……但，邊有咁多如果？
如果我當初用心學習，泡少啲妞補少啲習，可能而家已經係精算師。但對此我冇特別後悔。請循其本：如果我真係好想做精算師，就唔會咁懶啦。唔係話努力咗實掂，但唔返學都二等乙級啦，返吓學，應該有個二等甲級嘛？搵份工都唔係咁難咋？所以對此，我冇乜後悔。
如果係回到未揀科前，咁我當然諗過揀第二科啦，反正我可以在餐廳任點一道菜。我有諗過，如果去讀 Finance 讀 BBA，會唔會好啲？反正最後都係打金融工。又或者，如果講理想興趣，或者我去讀數學，或者去讀文學吧？好似都幾有型。況且，文學院多女仔（這才是重點）。
不過，行動大聲過廢噏。有得轉系吖，亦真係有人咁做，甚至有人讀多個學位添，我有冇咁做？冇喎。屋企唔係太等我開飯，亦唔係冇錢讀多年，甚至玩多 3 年——反正好大部分都係問政府借，長命債長命還。但我實在懶過梳乎蛋，唔讀都讀咗啦，都洗濕個頭啦，唔好搞咁多嘢。
對，我懷疑，畀我再揀讀第科，結果都係差不多。因為問題係我，唔係嗰科。而家諗返，我都冇後悔在馮平山讀完我個學位。亦冇後悔副修補習同泡妞。因為，呢一切一切，都造就今日嘅我。冇當日呢啲事，我就唔係我。
贏當然重要 但贏的過程更重要
好玄？咁講得簡單啲。而家興講贏在射精前，其虛妄好多人講過。但仲有一樣嘢，就係生命始終唔係一條直線。結果當然好重要，但途徑都好重要，而條路有時又影響結果。You never know.
我自細讀書成績好，學嘢快，學琴從來唔練琴。唔係好巴閉，但入到港大精算，足以當年令啲八婆親戚以及有啲女仔，會嘩一聲。但又如何？3 年後，我就由贏在起跑線變成大落後。
輾轉去到而家，中學畢業差不多廿年。而家，托賴，還可以啦。唔係話「撈得好掂」，但至少見返舊同學時，冇當年剛畢業變雙失時咁自卑，仲有餘力在呢度寫文同大家分享。唔係當日在馮平山蹉跎歲月，唔會有今日嘅我。生命真係唔係一條直線。都話 Steve Jobs 走堂聽書法用嚟整 iPhone。我今日識寫嘢，都要歸功於馮平山。阿 Q 精神講句，我啲精算同學會睇我嘅文，但我對佢哋嘅工作全無興趣。
生命嘅嘢當然似 NBA，好多時頭 3 節都 hea 打嘅，第 4 節先見真章。咁當然，贏在射精前嘅，覺得最好一開頭畀 50 分底分佢。咁當然有優勢。但，仲過癮咩？不如頒個盃畀你算。贏當然重要，好重要，但自己拎返嚟，點都爽過人哋畀個盃你。
（本文純屬作者意見，不代表香港01立場。）