每年 6 月，成間電視台都上下一心，對於新進小花，一齊評頭品足。有一年，老細安排咗個一流大學畢業嘅，跟我果team。呢位小姐第一日報到就同我講：唔駛畀野我做架啦，我嚟，淨係想報新聞。又有個美國大學畢業嘅香港女子，入咗 CNN 都死都要「舌累」返嚟香港，入個二三線嘅 local 電視台。女子話：咁先有機會紅…我去到外國電視台，先發現靚嘅真義。

新聞小花何處來？

電視台的年輕 anchor 習慣性被統稱為「小花」，已經忘了從什麼時代開始，也不知道是不是從花瓶一詞演變而來；有人聽了，對號入座自覺被貶，也有人大方接受兼且自我感覺良好：俾人讚靚喎。

近幾年脫離咗商業電視台，想睇邊個 anchor 我冇份話事。

小花們個個年輕貌美，早已超脫五官娟好的程度——我知咁講好 out——但真係好似咩咩校花同 yes girl，一號眼二號鼻三號嘴，以青春甜美為主調，冇辨識度，見完都唔記得係邊個。

以前的 anchor 唔係要靚架，係要端莊、知性、可信度高。真係唔係好慣見到A字短裙仔。

係，我老，sorry。同埋重點可能我唔係男人，男人可能睇得好開心。

但咩事要睇一個好似 campus tv 嘅人報嘅新聞呢。

每年 6 月，成間電視台都上下一心，對於新進小花，一齊評頭品足。

有一年，老細安排咗個一流大學畢業嘅，跟我果team。呢位小姐第一日報到就同我講：「唔駛畀野我做架啦，我嚟，淨係想報新聞。」

人各有志。

又有個美國大學畢業嘅香港女子，入咗 CNN 都死都要「舌累」返嚟香港，入個二三線嘅 local 電視台。女子話：咁先有機會紅。

可能好多入電視台嘅女仔都係咁諗嘅。

出鏡先會紅，出鏡先有出鏡費，main cast 之後報天氣，得三百蚊都好。

紅咗，先可以出書撈電視台一筆同嫁入豪門。

靚過名主播好多嘅新進主播落難記

好記得一個同期入電視台嘅女子，眼大大，白白淨淨，casting 咗幾次， 終於有得報星期六嘅早晨新聞。呢個女子嘅真人，其實靚過落咗妝就唔見咗對眼嘅名主播好多。

朝早 04 就要出門口，報咗幾次，又被嫌對眼太大，個樣太惡；又戴眼鏡又除眼鏡，試左n次，又話眼線尾端向下，天生屬於dup眼，觀眾可能唔鍾意云云。

女子壓力大，有日眼濕濕喺 pantry 同我講：阿woo，我好驚有靚過我、後生過我嘅入嚟。

冇得驚喎，呢個係昆蟲界動物界以及人類界嘅自然定律，靠樣入電視台搵食，就預咗；有腦嘅又駛咩靠樣。女子結果報咗三次早晨新聞就玩完。

新聞主播真正的「美」

我去到外國電視台，先發現靚嘅真義。

做咗三個月先知頂頭老細原來係以前叱咤一時的 news presenter（即係香港叫主播），全國無人不識。望下老細舊時幅相，又望下真人…… 原來……怪不得咁靚。

係，塊臉嘅皺紋同魚尾紋係好明顯，但五官清秀，眼神仲有種智慧嘅感覺，望落有幾分 Meryl Streep 嘅感覺。要上鏡，但唔扮後生，著件簡單嘅白恤衫，咩年紀做番咩年紀嘅事，就係靚。

外國 news presenter 大把 60 歲仲報緊新聞，無他，因為電視台嘅老細同睇電視嘅觀眾都明白，睇新聞呀，唔係睇選美呀，唔係凡事得個靚字就得。自信、真係知道自己報緊果段新聞係乜，對一位新聞主播來說，先係最緊要。

呢位有樣有腦嘅老細最後並冇選擇嫁入豪門，捱咗廿幾年，升到 news controller（新聞總監）；日日素顏返工，依然靚過晒戴三層假眼睫毛嘅妹妹仔。

落咗妝都靚，先係靚。但香港電視台嘅面試係唔睇素顏嘅，上行妝，坐上去，讀 auto cue。

喺畫面度見你個樣靚，就係靚，睇落唔靚，真人靚到識飛都冇用，其實同 in 緊香港小姐嘅最上鏡小姐無分別架。又唔係話要你天生麗質，總之唔理你用咩方式，層粉有幾厚，出嚟個妝夠貼夠靚，個人夠 sharp，就贏。

做假？唔公平？Show business 嘛（雖然，是的，那應該是新聞，sorry），唔需要真金白銀堅靚的，唔好太天真。

（本文純屬作者意見，不代表香港01立場。）

新聞主播究竟幾時開始叫「小花」？幾時開始鬥靚行先？　＃胡頁一話唔知，但就見過唔少呢啲鬥靚小花：//呢位小姐第一日報到就同我講：唔駛畀野我做架啦，我嚟，淨係想報新聞。又有個美國大學畢業嘅香港女子，入咗 CNN 都死都要「舌累」返嚟香港，入個二三線嘅 local 電視台。女子話：咁先有機會紅//