【集體回憶】落街踢波！那些年的街場回憶

打工仔過咗幾日假期，大家做咗啲咩？有無趁放假約埋三五知己踢波？
洛迪高以前返緊學時，就算唔係長假，基本上一到週末已經同好多朋友約埋落樓下踢波，不過投身社會後，有時連週末都無時間踢波，要趁四日連假先約得齊人。
不過大家要知道，而家踢波唔係好似以前咁了，唔係有時間想踢就踢，等洛迪高同大家講下一啲街場回憶啦。

文：洛迪高@世界波

1. 白飯魚

而家大家去踢波，都會見到五顏六色各款嘅波 boot。隨住香港生活水準嘅提高，好多人甚至小朋友都可以着各大牌子嘅鞋，但係洛迪高舊時無咁幸福，就唯有着神鞋白飯魚！白飯魚雖然設計簡單，但已經有時下波 boot 成日提及嘅元素：又輕又貼腳，球感真係一流，唯一唔好處就係易爛，不過嗰陣最平時試過 10 蚊對，雖然洛迪高零用錢唔多都負擔得到嘅，同埋洛迪高守龍，換鞋率又低啲。除咗白飯魚，當時仲有羽毛球鞋，洛迪高就不太喜歡，至於之後嘅超級白飯魚，筆者就未試過了。

2. 朝早踢波

其實而家假期朝早行過街場都幾唏噓，因為而家朝早似乎已經好少見到人踢波了，連一個人落樓射波少見，更唔好講鬥波了。可能以前筆者同班同學仔娛樂較少，早瞓之餘踢波都係假期娛樂，而且驚晏咗有大朋友嚟，就緊係要早啲起身。成十幾個人八點鐘踢波喎，換做而家好難想像了。

3. 跟隊

上面講到洛迪高細個要好早起身同朋友踢波，都係因為怕晏少少要同大好多嘅人跟隊（其實而家好多時去到下晝都未必多人踢波，夜晚街場先係最多人……）。可惜到今時今日，好似以前勁多隊係一個場跟隊，用幾分鐘輸一球可以令你球隊等足成個鐘都無波踢嘅場面已經不復見，隨而代之嘅，係大家殺得性起之際，有人拎住場紙同大家講：「book」咗場。好彩嘅，附近有其他場無畀人 book 都可以成班易地再戰（但一定更迫），如果附近無場／其他場太多隊／其他場又畀人 book 咗場，就真係敗興而歸了……

洛迪高並唔係反對 book 場，如果可以的話又湊夠人，相信都唔想有人打擾，不過喺而家嘅制度下，想 book 場已經難過登天，隨時又要出去食「炒價」勁唔抵。一日唔檢討下制度，想開開心心踢個波都唔易……

4. 守龍

筆者踢波做龍門，點解？事緣有一次畀人迫去守後就愛上做龍門了。講起街場守龍，大家都覺得除咗猜輸外，守龍嘅一係身材「健碩肥壯」，一係就好高（洛迪高都唔係……）。以前守龍都係企白線救波擋下，而家就唔同晒，因為「紐亞」style，而家係唔係都聽到「keeper」想龍門出嚟清埋波，跑動距離都多咗。

5. 賣水叔嬸

球場係英雄地，大把機會騷 quali，自然係「有女帶女」，無嘅點算？「冇女就帶水」。不過帶水都未必帶得夠，所以你係跟隊的話，踢完一場波通常都有賣水叔叔同嬸嬸好似呀爸呀媽咁關心你飲啲咩。佢哋選擇多元又比連鎖便利店平，而且夠「就腳」，相信生意都唔錯。

當我哋成日講發展香港足球時，「土地問題」都被一再提起，連草根足球都無可避免。其實除卻十一人場外，小型場如七人場及五人場都唔算缺乏，問題在於場地係咪真係畀大眾用得到？睇嚟呢個話題都係同好多香港唔少議題一樣，要由制度出發了。如果唔係，相信元朗某一個七人場經常有人去「處理」電箱令球場唔會去到十一點「停電」無得踢嘅情況只會發生得愈嚟愈多，一係就大家早啲起身落街踢波啦，我就約緊人，大家呢？

（文章純屬作者意見，不代表香港01立場。）