【來稿】本土主義抬頭　再不甘都要接受年輕人覺得六四不再重要

香港政壇本土主義抬頭，對好多舊有政治觀點都帶來衝擊，其實一個最首當其衝嘅，就係對六四事件嘅睇法。
香港自從一九八九年以來，就六四事件每年舉辦大型紀念活動，已成常態，六四晚會亦成為香港民主運動嘅一個圖騰。

文：余未

當年，中國政府因為政治理由，命令軍隊對手無寸鐵學生市民展開鎮壓，自然令人髮指，每一個支持人道主義嘅人都會對中國政府嘅行為表示憤慨。不過，因政治理由而鎮壓市民嘅事件唔係中國獨有，晌世界其他地方都發生過，韓國嘅光州事件就係一個例子。咁點解香港人會年復年咁記念六四事件，又唔會年復年咁記念光州事件呢？

歸咎背後嘅原因，香港人紀念六四除咗因為中國政府行為違反人道主義外，亦係因為事件發生晌中國，「身為一個中國人，冇辦法唔對事件身同感受」。換而言之，依種記念行為，係因為對中國人身份認同而引發。

返到而家，對於生於政權移交之後，支持本土主義嘅年青人嚟講，佢地認同香港人身份遠遠多於中國人身份。既然佢地冇果種對中國發生之事身同感受嘅感覺，六四事件對佢地嚟講，純粹只係一件發生晌北京嘅政治事件，自然冇需要大肆鋪張去紀念。另外，記念六四多年，「民主中國」卻毫無寸進，甚至連香港嘅民主都就快淪喪，功利嘅年青一輩自然難對六四記念活動有好感。

身份認同，同時代政治文化背景息息相關，並唔係「啱」或「錯」咁簡單粗暴嘅二元對立；引伸到身份認同所影響嘅政治活動，例如參與六四紀念活動，亦都唔存在「啱」或「錯」嘅選擇，每個人同每個團體都會有自己嘅考慮。對於多年參與六四記念活動嘅支持者，佢地就算心中有幾不甘，都必須要接受年青人覺得六四不再重要，唔係「共產黨搞搞震」或者其他陰謀嘅產物，而只係政治環境變化引起無可避免嘅結果。

花無百日紅，每一個政治活動嘅發起人都要面對時代變遷，即使係參與香港民主運動多年嘅支聯會亦不例外。每一個政治活動都應該晌當代搵到佢嘅功用，而晌本土主義抬頭、強調從香港出發嘅依個時刻，六四事件對香港民主運動仲可以發揮點樣嘅功用呢？

如果話六四記念活動嘅目的，係幫助「建設民主中國」嘅話，以現況論依個目標可以話係完全失敗：記念六四廿幾年，中國民主發展不進反退。我相信好多人亦都睇唔到六四記念活動繼續落去，對中國政治環境可以帶來實質嘅變化。晌現實角度出發，「建設民主中國」晌記念六四意義嘅討論中，唔應該再有重要嘅角色。

近日關於記念六四嘅新聞，有一單令我印象特別深刻。報導講述有中學教師帶領學生參觀六四記念館，有新移民學生參觀後感到震驚，終於明白香港人為何對中國政府抱有成見處處提防。

上述果篇新聞報導證實一點：新移民嚟到香港，有機會接觸了解一啲中國社會唔會提及嘅政治事件，當鐵一般嘅證據擺晌佢地眼前，足令佢地當中一部分人改變港中兩地關係嘅睇法。換而言之，六四事件同其他同類政治事件，能夠幫助我地改變部分新移民嘅政治立場，令佢地能夠理解香港人嘅諗法。

令部分新移民嘅政治立場同香港人靠近，就係六四事件晌而家嘅政治環境應該發揮嘅最大功用。如果要發揮依個功用，就六四事件需要舉辦嘅活動，重點可能唔再係每年一次嘅大型燭光晚會，而係持續對新移民人口關於六四及同類事件嘅宣傳同教育工作了。

每年嘅燭光晚會都會令晌電視上經歷六四事件嘅香港人深受感動，曾經參與過晚會嘅民眾亦都會希望持續咗二十七年嘅燭光能夠繼續燃點落去，直至事件獲平反為止。但如果六四事件再晌現今嘅政治格局搵唔到合適嘅定位，只會每年參與嘅人數比上一年少，然後消亡。

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）