「資深」傳統老闆角度，Facebook不過是他平日寫一句話上一幅相的地方，所花資源近乎零，時間僅以秒計，花錢？我連whatsapp收錢都唔會用……但係，偏偏好快又會來到比較時刻：點解某某醫院組織個like數多我哋咁多？人哋又有Video又有剩，我哋得果少少相唔得喎！諗下都知，咁咪又做死人囉。

「用唔用FB專頁好？」

你無睇錯我無打錯，2016年嘅今日，的而且確仍有公司企業，問緊呢個問題。用00後表妹嘅講法：「FB係你哋班8.90後中坑嘅玩意，都過氣啦仲問，我連IG都唔係日日用。」呢個時候仲講FB，好似真係Out過排芝士撻。

不過業界現實係，不少老牌機構，特別是非牟利組織，其實仍未曾建立一個所謂官方的FB專頁，反而他們旗下的大小中心安老院幼兒園，會有他們自己的FB專頁，介紹他們的日常活動與相片分享，即係基本上，唔使你親身去中心睇佢個告示欄咁解。

你問，點解中央單位仍掙扎於要不要開Facebook專頁？

當然是無錢無資源無時間。搞一個 Facebook 專頁，等於打開了一個24小時供人隨意到訪的門口，要監察路人們的post，又要上載啜核抽水打擦邊球而不自傷的好post，到不幸遇上關公災難時，還要懂如何拖延甚至反將一軍，這需要一隊年輕有sense有幽默感的團隊，沒有100毛威力，也期睇盼有田毛毛水平，起碼，唔好請到 Eric Chan（唔明請google一下，周浩鼎教的）。

唔肯揼錢搞Page　咁不如唔好搞

然而站在「資深」傳統老闆角度，Facebook不過是他平日寫一句話上一幅相的地方，所花資源近乎零，時間僅以秒計，花錢？我連whatsapp收錢都唔會用，看不出、也算不出公關部門要額外花資源去搞這東西，「你們呀，將官方網站的更新相片資料倒模過去就是，定期介紹一下我們的活動就夠呀。」

其實潛台詞即是：「總之，我要有個平台，方便我 share下公司嘅威水嘢，最緊要有我大頭嘅相，畀我班董事/同事/姊妹/家人，比條我link我就夠。」FB，即係變相又係官網。

本來如此，相安無事，用自己方式做一個可供老闆自high的FB就是，但係，偏偏好快又會來到比較時刻：點解某某醫院組織個like數多我哋咁多？人哋又有Video又有剩，我哋得果少少相唔得喎！

諗下都知，咁咪又做死人囉。

為左迴避呢個問題，好多行家深明多一事不如少一事，抽唔起無謂扮玩得，可以唔做咪唔做，真係要做，咪做個四平八穩唔抽水安安定定嘅專頁，定時定候賣下廣告送下禮物，係悶，但係唔會抽著火水死錯人嘛。

勉強無幸福，其實一個無人理嘅 FB Page，同無呢個 FB Page，有咩分別？我睇唔透。

（本文純屬作者意見，不代表香港01立場。）