朱咪咪自爆幾年接得一個TVB節目 未拍完就確診唔知有冇騷錢收

撰文:鄧穎琪
出版:更新:

朱咪咪今日(28/3)現身一個長者活動,現居新加坡的她回港幾日,指自己有工作就會回來,但幾年間在香港卻只得一個無綫賀年節目Job,而且拍到一半就「中招」拍唔完。講到無綫近日發盈警,問到未拍完有冇騷錢收,咪咪姐就說未打簿不知道。

朱咪咪在聚餐上大唱多首經典金曲,逗得現場老友記好開心。(葉志明攝)

朱咪咪今日(28/3)在紅磡一間酒樓出席一個長者聚餐,活動上大唱《上海灘》、《風的季節》等金曲,逗得現場老友記很開心。講到近況,她說長居新加坡,間中到美加等地登台,因為在香港冇Job,疫情幾年只得一個Job,而且更出師不利。咪咪姐說:「返新加坡住下咋嘛,香港都無job俾我做!香港樣樣物價又貴,我竄返新加坡,晏晝食一餐都係唔超過5蚊坡紙(約港幣$30),就有碗湯粉加杯咖啡。」

朱咪咪難得回港,見她消瘦不少,她指中招後身體變差,加上屋企少煮飯,所以瘦了十幾磅。(葉志明攝)

她指近幾年在香港冇Job,只有月前無綫的《新春開運王》節目,點知未拍完就確診肺炎,咪咪姐說:「《新春》本來有六集,我拍咗三集,就冇喇!拍咗一場就中咗招、瀨咗嘢,可能香港呢個方位唔好。」她當時第一次中招,幾日無法下嚥,臥病在床,生活只得飲水食藥,辛苦極了。近日無綫發盈警要開源節流,問到收到節目騷錢未,她表示:「係喎!我都未去check喎!陣間做完呢個長者show就去打簿!我返去check check先,你唔講我都唔知。」

朱咪咪自爆在香港冇Job,疫情以來只得一個賀年節目,暫時亦無意拍劇,除非很多戲份。(葉志明攝)

咪咪姐原定於去年九月開演唱會,但原來她信錯人,差點簽下條款辛辣的合約,要將未來幾年任何類型演唱會的版權都歸予對方擁有,最終咪咪姐拒簽合約,寧願取消演唱會。她今日透露合約問題已經解決,相信最快九月入紙申請紅館演唱會,又說:「已經好多人問緊我點解唔開紅館,我話唔得住,成個演唱會其實我已經有個大概,但係因為依家未申請得,要一年,到時申請幾耐就唔知。」問到對方有否道歉,咪咪姐表示:「唔使啦,正所謂事無不可對人言,我既然知道你個人係咁,就擺咗喺心度囉,唔係話要報復,我哋唔係咁嘅人嚟嘅,你睇我個樣幾和善!不過可能後面有把刀,我自己都唔敢包!哈哈!」

朱咪咪之前的演唱會合約糾紛已解決,她預告9月就會再入紙紅館開騷。(葉志明攝)

咪咪姐會在香港留到31號,她自爆自己好大懵,以為訂好機票,叫囝囝Check in時才知原來未買機票,不得不承認年紀大記性差,又謂:「唔怕同大家講,我係電腦啲掣都唔識撳,我完全唔識上網,我識揸個手提電話,識WhatsApp已經好好。(唔叫阿仔教你?)佢唔係唔教,你要我肯學先得,我覺得咁麻煩,就叫佢哋嚟囉。好彩我都冇辜負我個姓,我姓朱,我天性係懶嘅。」