【德國生活誌】香港打工為咗易買樓 德國搵樓難過你搵工

撰文:
最後更新日期:

小菲最近喺德國租樓,真係租到人生低潮。你以為香港地少人多租樓好貴咩?德國地方大但係單單想租已經令你頭痛欲絕。想搵間 dream house 真係難過你搵份 dream job!

最近香港最 viral 的其中一單新聞,係內地同胞喺香港大灑金錢喺其實佢地心目中唔算好尊貴嘅香港買樓,只係為咗令子女做喇沙仔。其次就係雙非家長公開承認夾份合租北區單位,為咗子女喺香港讀書之餘,可以喺統一派位裏面派到北區小學。最過癮係雙非家長唔覺得自己搶緊香港學位,但本地家長已經大呻北區畀內地同胞分薄晒啲入學機會。

小菲心諗,如果香港租樓都好似德國,會唔會一天都光晒?

德國租樓條件隨時多過港女搵老公!

落地德國之前小菲租定 service apartment,以方便自己落地後慢慢搵樓。同一間管理公司同一棟大廈裏面,有幾款唔同尺寸唔同間格的屋畀你揀。網上簽約,銀行過數,方便快捷,極其量都係要求你遞交張對上三個月的糧單過過目,過程俐落。小菲落飛機後住咗兩晚酒店,慢條斯理拎鎖匙,咔擦開門,立即入住。

住落三個月,開始熟習地形,揀啱心水 location,就開動搵樓。點知一搵就頭痛……真係心血少啲都隨時跳掣。

網上放租的樓盤唔算少,幾個最大的租屋網日日都有大量更新;小菲心水的地段每日最少都有六、七個新盤放租。但租樓第一步,就係要交文件先。想睇樓咩?麻煩你填低啲文件先啦。尤其係私人放租,九成都要你先放低呢幾兩。

呢啲文件包括啲咩?先係一張大同小異嘅 form,填好你(同埋同住者)的姓名、年齡、工作、收入、有冇結婚、有冇小朋友、有冇養寵物、有冇食煙等等;然後就係你的薪水證明、你份工嘅合約(自顧人士可免份合約嘅)同埋你個德國 ID 或者護照。係呀,淨係想睇樓都先要大步跨過個門檻呀。條件多到呢……如果係公司放租都好啲,因為有一部分冇入門條件,即係去到睇樓嗰陣先交文件,唔啱心水囉咪慳返囉,私隱唔使周圍派。

喺德國大城市搵樓有機會難過你搵工呀!

當你以為可以睇啱先交 form 的時候,少年你真係太年輕了。小菲出發睇樓,agency 約好星期一朝早八點,你以為佢淨係約你咩?同一個時間有廿幾個潛在租客同你一齊睇,小菲完全唔理解點解大家都唔使返工。冇錯,德國真係連租樓都有睇樓團!

星期日下晏三點又有第二個 agency 約小菲,小菲心諗今次睇啱就立即交低申請書,點知今次睇屋人數突破 50 人!小菲今次有留意其他租樓人士,之前網上爬文時提到要準備的 cover letter——即係自我介紹呀,點解想租,有咩超能力呀之類——真係有出現,更人將文件好有心機咁有釘裝成一份。嘩!嗰種準備真係同你見工差唔多,真係 hunt 一間 dream house 難過你 hunt 一份 dream job 呀。大家排隊嘅時候小菲都準備走人,迫過香港睇示範單位,睇嘅心情都無埋,默默離開嘅時候仍然見到不停嚟睇樓嘅人潮。

星期日下晏三點又有第二個 agency 約小菲,小菲心諗今次睇啱就立即交低申請書,點知今次睇屋人數突破 50 人!(作者提供圖片)

小菲見埋第三間 agency,第三次睇樓同場計埋小菲有成八個單位同你爭租,但睇樓嘅 time slot 由五點去到八點都約好晒,真係唔好想像一間屋有幾多人同你一齊爭呀。

再唔係更有 open viewing,時間地點講好晒,歡迎 walk-in 交 form,真係閒閒地都有幾廿人一齊睇,迫過你行年宵。

呢個時候,你會發現私人出租情況會無咁混亂;但唔代表少啲人爭。屋主 screen 過晒覺得你職業唔錯、收入唔錯咪比你睇下樓,畀你睇完樓佢再慢慢揀多一轉;但千祈唔好唔記得你面對嘅係寫得一手好 cover letter 的對手(們)。加上好多上年紀的業主未必識英文,唔想租畀外國人怕難溝通呢回事真係好普遍。而你嚟呢度做咩,你會住幾耐,都係佢揀你的條件;如果你話你係雙非嚟呢度就係想呃九年(定係而家12年?)免費教育想要派到北區小學真係唔使旨意有人想租畀你,就算你幾個人合租畀多啲錢都係咁講。

有錢冇樓租真係好可憐,何況小菲冇錢。不過搵樓咁難其實都係因為法例保障租戶多於業主,而且德國人真係睇自己文化重要過錢咁解囉。如果香港人放租都唔係錢行先,揀合適的租戶先,成件事會唔會唔同啲?香港會唔會唔同啲?

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。