【旺角騷亂．博評】以後個個政治犯都走去台灣，點收科？

6月8號星期四，一單唔多起眼嘅新聞，講有位被控暴動罪嘅香港女仔（下稱「事主」），今年1月缺席法庭聆訊，而家話好似已經棄保潛逃，著咗草去台灣，想搵「政治庇護」云云。新聞唔算好轟動，但其實幾值得討論。

循例利申先：本人在台資公司打工，加上屋企搞緊移民台灣，一年去台灣十幾廿次。當然稱不上係咩專家，但我的確特別留意同港台有關嘅新聞。法律嘅嘢我當然唔識，咁點解仲要講？因為即使你問法律界嘅專業意見（我都問咗），都會話你知，一去到「國際關係」，香港同台灣都係相當特殊嘅例子，未必有先例可參考，好多灰色地帶。

先諗下，點解事主揀台灣？初步諗幾合理，因為好多香港人著草都係去台灣。呢度嘅著草可以係廣義嘅，撈唔掂，失意，在香港出咗問題，台灣往往係一個offer second chance嘅地方。 

邰正宵在香港長大，讀書唔夠叻，入唔到港大醫學院，轉去台灣讀醫，最後反而在台灣唱歌出碟，紅返香港。周華健一樣係香港出世台灣讀書，在台灣走紅再「反攻香港」。當然仲有郭富城，地道香港仔，但在TVB只係奀星，忽然間在台灣拍廣告紅咗，成為天王。

更加有趣嘅，就係一班黑白兩道嘅人。四大探長韓森呂樂都去咗台灣，曾志偉老豆曾啟榮亦都走咗去台灣，仲大搖大擺咁擺酒賀壽叫晒香港明星去的。就連《大時代》入面丁蟹，龍城邦（總華探長，曾江飾）同周濟生（毒販，劉江飾）都走去台灣。

點解揀台灣？有唔少原因。最多人講嘅係台灣同香港冇引渡協議，去咗好少畀人拉到。另外，特別係而家蔡英文上咗台，明顯對大陸唔友好，「交人」嘅機會似乎冇咁高（相比之下，留意桂民海係在泰國出事嘅）。仲有更加現實嘅係，台灣離香港近，生活模式，文化，衣食住行都似，易適應。而台灣洗費又平，衰啲講句若果事主搞到要長期黑市居留嘅，都可以生存好耐，老豆老母想嚟探都易啲。

仲有，在台灣黑市居留，「其實唔難」，亦遠比你想像中普遍。你唔拎健康保險唔打正經工作（大把人做黑工）唔開銀行戶口就得， 唔少人係咁。 舊年9月有個英國人在台灣打劫便利店，原來已經黑市居留16年，冇晒錢所以想坐監。2013年仲勁，有個香港人在台灣因為在超級市場偷嘢，畀人發現原來黑市居留37年！ 留意以上兩位都係因為犯事先畀人揭發， 正常冇行差踏錯嘅， 真係有排都冇人知，我懷疑你去檢舉都冇人理。

咁但，細心諗下，頭先講咩四大探長之類，都係幾十年前。當時香港係英國殖民地，而家已經回歸。同一套玩法，係咪仲work，我就有啲懷疑。而呢套「台灣同香港冇引渡協議，走去拎政治庇護」嘅想法，係有盲點嘅。

首先，「冇引渡協議就拉唔到人」，只係wishful thinking。文首講過，台灣同香港都係好特殊嘅例子，但國際關係嘅嘢，條文就死嘅，人就生的。 舊年荃灣石屎藏屍案，4個疑犯一樣潛逃去台灣，最後個女仔舉報另外3個人，結果台灣警察捉咗人。冇引渡協議又如何？冇所謂，當你逾期居留，踼出境，然後香港警察「咁啱」安排在飛機上，返到香港先拉，就唔涉及跨境執法又冇正式引渡啦。 冇犯協議拉唔到人？你話呢？條文好死嘅，人係靈活的。

OK，你可以話，石屎藏屍案時，其實蔡英文仲未上台，而家唔會咁順攤。咁又睇下，上個月，有位內地異見人士張向忠，在台灣離開旅行團搵政治庇護。結果？一樣比台灣踼返大陸，返到廈門就畀公安帶走。疑共/反共嘅蔡英文會唔會交人？你話呢？

第二個盲點，就係「去台灣搵政治庇護」。其實有冇諗過，台灣有冇呢樣東西嘅呢？答案，應該係冇嘅。同本文案件無關，但王丹早排回應盧斯達嘅質疑，就提過台灣冇難民法，根本冇得畀「政治庇護」。事實係台灣嘅難民法案過咗一讀，但未成為法律。而在國際層面，當然台灣亦冇份簽啲咩難民公約或協定書之類嘅物體。

再退一萬步，當台灣有呢類法案都好，但其實申請「庇護」嘅理據都好薄弱。你點去convince人事主係「政治犯」？佢因為旺角衝突而被控暴動罪喎，點spin到去「政治犯」？而同時間，你點當佢係難民？佢返到香港會受迫害？會受酷刑受不人道對待？定係香港嘅court都係袋鼠法庭法治已死？某啲人可能信呢啲講法，但肯定唔係「國際層面」嘅共識。我地講緊香港呀大佬，唔好當係啲第三世界國家嘛，人哋啲台妹個個星期飛嚟食澳牛食許留山，你講到未開化嘅番邦咁，有冇說服力先？

事情發展落去會點，都真係唔好跟車太貼咁早下定論。不過依我估計，由於上面講嘅原因，你叫台灣公然出嚟畀咩庇護（如有），似乎都冇乜可能。況且，開得呢個先例仲得了？以後個個都話政治犯走去台灣，點收科？除非你開個特例畀事主，之後落閘。但我又唔認為事主有咁重要值得開特例 – 王丹都冇拎到台灣政治庇護喎。

咁可能性剩返兩個。一係，好似之前石屎藏屍案咁處理，即係搵到人，當逾期居留趕出境，然後在香港拉人。呢個好似係最正路嘅做法，但又畢竟事主唔係殺人疑犯，而台灣如果咁做，少不免會有人話蔡英文向大陸叩頭，蔡英文而家民望咁低，未必好輕易會咁做。

另一個做法，當然就係詐詐諦不了了之，係呀好似有人逾期居留喎，咁我哋去搵吓啦，未搵到喎等吓啦，歡迎提供資料，搵到話你知。事主睇完呢幾日香港同台灣報導，應該知道：

1）冇引渡協議都可以「移交」到疑犯
2）台灣並冇「難民法」
3）事主嘅情況話係難民或畀人迫害，亦似乎唔係好講得通。

咁一係， 就乖乖地返香港。 一係， 就在台灣做黑市居民咯。上述都講過， 唔係太難，又唔係太貴。不過就避開啲港人蒲點， 唔好去上引水產食壽司或去信義誠品打卡。 但，唔知等幾多年喎，冇得返香港更冇得去日本睇漩渦喎，真係值得？

（本文純屬作者意見，不代表香港01立場。）